ABŞ-nin keçmiş Prezidenti Donald Tramp ifadə vermək üçün Nyu-Yorkun baş prokuroru Letisiya Ceymsin ofisində təxminən səkkiz saat qalıb...
Bildirilir ki, sabiq Ağ Ev rəhbəri ofisə səhər saat 9:30-da gəlib, axşam saat 18:00-dan sonra çıxıb.
Tramp daha sonra özünün “Truth Social” şəbəkəsində gecə saatlarında yazdığı paylaşımda dindirilməni “ABŞ-nin 45-ci prezidentinin növbəti ədalətsiz və gülünc təqibi” adlandırıb. O, ona qarşı aparılan müxtəlif araşdırmalar barədə informasiyanı dərc edib və bunları seçkilərə müdaxilə adlandırıb.
Mediada yayılan məlumatlara görə, Donald Tramp susmaq hüququndan istifadə etmədən müstəntiqlərin suallarını cavablandırıb.
Qeyd edək ki, Nyu-Yorkun baş prokuroru Letisiya Ceyms ABŞ-nin keçmiş Prezidenti Donald Trampa, onun övladlarına və əlaqəli şirkətlərə qarşı saxtakarlıq və yalan məlumat verməkdə ittiham edərək 250 milyon dollarlıq iddia qaldırıb. Bu iş keçən həftə Trampa qarşı maliyyə fırıldaqçılığı ittihamı ilə bağlı deyil.
Xatırladaq ki, bundan əvvəl ABŞ-nin keçmiş prezidenti müvəqqəti həbs edilib. O, maliyyə hesabatlarını saxtalaşdırmaqda 34 maddə ilə ittiham olunub. Tramp ittihamların heç biri üzrə özünü təqsirli bilməyib. O da, öz növbəsində, keçmiş vəkili Maykl Kohenə qarşı 500 milyon dollarlıq iddia qaldırıb. Tramp vəkilini öhdəlikləri pozmaqda və müştərinin məxfi məlumatlarını açıqlamaqda ittiham edir.
Poliqon.info