Səmərqənddə beynəlxalq konqres keçirilir

Bu gün Özbəkistanın Səmərqənd şəhərində “Özbəkistanın mədəni irsi – yeni intibahın təməli” mövzusunda VI beynəlxalq konqres öz işinə başlayıb.

“Report”un Səmərqəndə ezam olunmuş əməkdaşının verdiyi məlumata görə, konqresin açılışında Özbəkistanın turizm və mədəni irs naziri Əziz Abduhakimov videoformatda tədbir iştirakçılarını salamlayıb.

Tədbirin məqsədi Mərkəzi Asiya mədəniyyətini öyrənən beynəlxalq elmi ictimaiyyəti birləşdirmək, Özbəkistanın mədəni irsinin öyrənilməsi, qorunması və təbliği üzrə Dünya Birliyinin ötən bir ildəki işini təqdim etmək və beynəlxalq fəaliyyətin yeni istiqamətlərini işləyib hazırlamaqdır.

Konqresin işində 250-dən çox dünya şöhrətli şərqşünas iştirak edir. Onlardan 33-ü təşkilat direktoru, 6-sı beynəlxalq təşkilatların nümayəndəsi, 7-si qurum prezidenti, 13-ü akademik, 22-si professor, 18-i elmlər doktoru, 6-sı elmlər namizədidir.

Konqresin mərkəzi tədbiri ömrünü Özbəkistanın mədəni irsinin öyrənilməsinə həsr etmiş alimlərin davamlı, mürəkkəb fəaliyyəti nəticəsində “Özbəkistanın mədəni irsi dünya kolleksiyalarında” seriyasından 10 yeni kitab-albomun (51-60 cild) təqdimatı olacaq.

Konqres çərçivəsində həmçinin xarici dövlətlərin Özbəkistandakı səfirliklərinə “Özbəkistanın mədəni irsi dünya kolleksiyalarında” seriyasından kitab-albomların alınması üçün sertifikatların təqdim edilməsi mərasimi də keçiriləcək.

Konqresin elmi hissəsi zəngin və məzmunlu olacaq. “Özbəkistanın mədəni irsi müasir elmin diqqət mərkəzində” beynəlxalq elmi konfransın, “Xalqları birləşdirən irs: Mərkəzi Asiya və Azərbaycan”, “Dünya Birliyinin fəaliyyətinin yeni istiqamətləri: planlar və perspektivlər”, “Milli muzeylər və kolleksiyalar Dünya Birliyinin diqqət mərkəzində” dəyirmi masalarının keçirilməsi planlaşdırılır.