Rusiya əhalisinin müharibə itkiləri ilə bağlı narahatlığı artıb...

Poliqon xəbər verir ki, bu barədə The New York Times qəzeti sosial şəbəkələrin Rusiya seqmentində nəşrləri və şərhləri təhlil edən “FilterLabs AI” şirkətinin araşdırmasına istinadən məlumat yayıb. Qəzet yazır ki, rusların Ukraynadakı müharibədəki itkilərə münasibəti getdikcə mənfi xarakter alır. Rusiyada ictimai rəydəki bu dəyişikliyi nəşrin Vaşinqtondakı həmsöhbətləri də qeyd ediblər.

“FilterLabs AI” şirkətinin saytında dərc olunan qrafikdən görmək olar ki, 24-28 fevralda sosial şəbəkələrdəki şərhlərə görə rusların Ukraynadakı itkilərə münasibət indeksi mənfi olub. Araşdırmaya görə sonradan əhval-ruhiyyə yaxşılaşsa da, yaz aylarında indeks üç dəfə daha çox mənfiyə doğru hərəkət edib.

NYT “FilterLabs”ın məlumatlarına istinadən yazır ki, müharibənin əvvəlində qurbanların sayının çox olması ilə bağlı narahatlıq artıq Putinin dəstəyinə mənfi təsir göstərib, lakin təsir qısamüddətli olub və cəmiyyət yenidən hakimiyyət ətrafında toplaşıb. NYT-yə görə, indi vəziyyət fərqli görünür.

“FilterLabs”ın baş icraçı direktoru Conatan Toybner NYT ilə söhbətində deyib ki, Rusiyada dövlət qurumları əhalinin artan narahatlığına qarşı durmağa çalışır, lakin işğalın ikinci ilində onların ictimai rəyə təsiri azalıb.

“Zaman keçdikcə, itkilərlə bağlı narahatlıq davam edərsə, Rusiyada müharibəyə dəstək azala bilər. Kreml ictimai rəyi dəyişdirmək səylərinə baxmayaraq, real itkilər Kremlin əsas zəif tərəflərindən biri olaraq qalır”, deyə Toybner bildirib.

Qəzetə müsahibə verən ABŞ hökumət rəsmiləri Rusiya ictimai rəyini izləmək çətin olduğunu vurğulasalar da, onlar razılaşırlar ki, son aylarda müharibəyə ictimai dəstəkdə çatlar yaranmağa başlayıb.

Rusiya “Levada” Mərkəzinin bu həftə dərc olunan son məlumatlarına görə isə Rusiyada ictimai əhval-ruhiyyə nəhayət səfərbərlik elanının yaratdığı stressdən qurtulub.

“Levada” Mərkəzinin sosial-mədəni araşdırmalar şöbəsinin rəhbəri Aleksey Levinson bunu 1990-cı illərdə travma almış cəmiyyətin reaksiyası ilə izah edir. Levinsonun fikrincə, müharibəyə dəstək və prezidentin bəyənmə reytinqi yüksək olaraq qalır. Levinsona görə cəmiyyət Putinin arxasındadır və xalq yaxşı başa düşür ki, müharibədnun yeganıə məqsədi “Rusiyanın qüdrətini” qoruyub saxlamaqdır.

“Biz Qərbə qarşı dayanırıq və möhkəm dayanırıq. Putindən tələb olunan da budur”, Levinson fikrini yekunlaşdırıb.

Poliqon.info