Daşnaksütun Partiyasının liderlərindən olan İşxan Saqatelyan avqustun 6-da Ermənistan parlamentinin sədr müavini seçilib. Novator.az-ın məlumatına görə, o, birləşmiş müxalifəti təmsil edir.
Ermənistanın yeni parlamenti avqustun 2-də fəaliyyətə başlayıb. İyunun 20-də seçilmiş 107 nəfərlik parlamentdə hakim Vətəndaş Sazişi Partiyasının 71 mandatı var. Bu qurumdan Alen Simonyan parlamentin sədri, Ruben Rubinyan və Akop Arşakyan sədr müavini postlarını tutublar.
Qatı millətçi kimi tanınan İşxan Saqatelyan 20 iyun seçkisində ikinci prezident Robert Köçəryanın, Daşnaksütun Partiyası və Dirçələn Ermənistan Partiyasının cəmləşdiyi Ermənistan blokundan deputat mandatı alıb. Bu blok parlamentdə 29 yer əldə edib.
Üçüncü prezident Serj Sərkisyanın Ermənistan Respublikaçılar Partiyasını Milli Təhlükəsizlik Xidmətinin sabiq direktoru Artur Vanetsyanın Vətən Partiyası ilə birləşdirən “Qürurluyam” blokunun 7 mandatı var.
İşxan Saqatelyanı parlament sədrinin müavini postuna hər iki müxalif blok vahid namizəd göstərmişdi.
pia.az