Putin G-20 sammiti çərçivəsində Yaponiyanın baş naziri ilə görüşəcək

Rusiya prezidenti Vladimir Putin və Yaponiyanın baş naziri Sindzo Abe iyun ayının 29-da Osaka şəhərində “Böyük İyirmilik” sammiti çərçivəsində görüş keçirəcək.

ONA “TASS” agentliyinə istinadən xəbər verir ki, bu barədə Rusiya XİN-in rəhbəri Sergey Lavrov yaponiyalı həmkarı Taro Kono ilə keçirilən görüşün nəticələri barədə açıqlamasında deyib.

“Biz iyunun 29-da G-20 sammiti çərçivəsində planlaşdırılan prezident Putinlə baş nazir Abenin növbəti görüşünə hazırlıq ərəfəsində bütün sahələrdə əlaqələrimizin inkişafına dair saatlarla söhbət etdik”, - deyə Lavrov bildirib.

Rusiyalı rəsminin sözlərinə görə, dövlət başçılarının görüşünə hazırlıq çərçivəsində iki ölkənin daxili və xarici işlər nazirləri də “2+2” formatında konfliktlərin nizamlanmasını və xarici siyasət əməkdaşlıqlarını müzakirə ediblər.

Qeyd edək ki, sammit iyunun 28-29-da Osakada baş tutacaq. Bu, Yaponiyada baş tutacaq ilk belə forumdur.

pia.az