Putin böyük biznesə dövlət qarşısında məsuliyyəti xatırladacaq

Poliqon.info xəbər verir ki, bu barədə Bloomberg Agentliyi iclasın hazırlanması ilə bağlı məlumatlı mənbələrə istinadən məlumat yayıb. Nəşrin məlumatına görə, tədbir cümə axşamı, martın 16-da baş tutacaq.

Agentliyin həmsöhbətləri bildirirlər ki, görüşdə prezident ölkənin iqtisadi artımının bərpası məsələsinə də diqqət yetirəcək.

Xəbərdə bildirilir ki, Rusiyanın biznes nümayəndələri də öz növbəsində dövlətin iqtisadiyyatda rolunun artması ilə bağlı narahatlıqlarını prezidentə bildirmək və biznes mühitinin liberallaşdırılması istiqamətində addımlar təklif etmək istəyirlər. Mənbələr bildirirlər ki, biznes nümayəndələri xüsusilə müəyyən iqtisadi cinayətlərin, o cümlədən çirkli pulların yuyulmasının dekriminallaşdırılmasını təklif etmək istəyirlər.

Bloomberg qeyd edir ki, Ukraynada müharibənin yaratdığı büdcə kəsirini azaltmaq üçün hökumət iri bizneslərdən büdcəyə 300 milyard dollar məbləğində əlavə vergi yığmağı planlaşdırır. Agentlik mənbələri bildiriblər ki, Putinlə görüşdə məsələ ilə bağlı yekun qərar veriləcəyi gözlənilmir.

Xəbərdə qeyd edilir ki, Rusiya böyük biznesinin bəzi nümayəndələri müharibə başlayandan sonra Rusiya hakimiyyətindən uzaqlaşmağa çalışırlar. Bəziləri, o cümlədən “Alfa-Bank”ın ortaq sahibləri Pyotr Aven və Mixail Fridman Rusiyaya qayıtmaqdan imtina ediblər. Bir neçə oliqarx isə ümumiyyətlə Rusiya vətəndaşlığından imtina edib. Onların arasında Oleq Tinkov, Yuri Milner və Nikolay Storonski var.

Xatırladaq ki, yanvar ayında Rusiyanın ən varlı oliqarxlarından biri Əlişir Usmanov Rusiya Sənayeçilər və Sahibkarlar İttifaqının İdarə Heyətini tərk edib və bunu təqaüdə çıxmaq istəyi ilə izah edib.

Poliqon.info