ABŞ-ın Ukrayna Silahlı Qüvvələrinə verilən Amerika silahlarının Rusiya ərazisinə endirdiyi zərbələrlə bağlı mövqeyi dəyişməz olaraq qalır...
Poliqon xəbər verir ki, bunu Pentaqonun sözçüsü Patrik Rayder deyib. O, Ukrayna prezidenti Vladimir Zelenskinin zəngləri fonunda məhdudiyyətlərə yenidən baxılması planının olub-olmadığı sualına belə cavab verib.
“Bizim siyasətimiz dəyişmir. Ukrayna ABŞ-ın hərbi yardımından özünü sərhədyanı hücumlardan müdafiə etmək və cavab atəşi açmaq üçün istifadə edə bilər. Bununla belə, uzaq məsafədən zərbələrə, Rusiyanın dərinliklərinə endirilən zərbələrə gəlincə, bizim siyasətimiz dəyişməz olaraq qalır”, deyə Rayder brifinqdə bildirib.
Qeyd edək ki, bir gün əvvəl “Politico” qəzeti xəbər vermişdi ki, Ukrayna rəsmiləri Rusiya ərazisinə zərbələr endirmək üçün potensial hədəflərin siyahısını tərtib ediblər. Onun ABŞ-ın yüksək səviyyəli milli təhlükəsizlik rəsmilərinə təhvil verilməsi planlaşdırılır. Qəzetin fikrincə, hədəfləri vurmaq üçün Vaşinqtonun Rusiyaya zərbələr endirmək üçün uzaqmənzilli silahlardan istifadəyə qoyulan qadağanı aradan qaldırması lazımdır.
Poliqon.info