Fransa Pavel Durovu ittiham etmək üçün 2004-cü il gizli kriptoqrafiya qanunundan istifadə edib...
Poliqon xəbər verir ki, bu barədə Politico nəşri məlumat yayıb. Nəşr yazır ki, Telegram-ın rəhbəri Pavel Durovun Fransada səs-küylü həbsi avropalı müstəntiqlərin onlayn cinayətlərlə mübarizə üçün bütün səlahiyyətlərdən istifadə etməyə hazır olduqlarını göstərib. Bununla belə, daha az görünən iki iddia texnologiya sənayesində ən çox narahatlığa səbəb olub. Politico qeyd edir ki, Fransa hakimiyyəti Durova qarşı hüquqi iddialar irəli sürmək üçün bir növ “gizli kiber qanun”dan istifadə edib.
Avqustun 28-də verilən həbs orderində Durova qarşı “təsdiq edilmiş bildiriş” olmadan şifrələmə xidmətləri göstərmək və “əvvəlcədən xəbərdarlıq etmədən” şifrəli messencer idxal etmək də daxil olmaqla altı ittiham göstərilir. Məhz bu iki ittiham Signal və iMessage kimi şifrəli sosial rabitə messencerlərini də idarə edən şirkətlər üçün tamamilə sürpriz olub və onları məhsullarının Fransa qanunlarına uyğunluğunu yenidən nəzərdən keçirməyə məcbur edib.
Fransa qanunlarına əsasən, kriptoqrafik alətləri təmin edən bütün şirkətlər ANSSI kibertəhlükəsizlik agentliyini xəbərdar etməli və proqram təminatının mənbə kodu daxil olmaqla, istifadə edilən şifrələmə alətlərinin texniki xüsusiyyətlərinin təsvirini təqdim etməlidir.
Hələ 2004-cü ildə tətbiq edilən bu tələb əvvəllər heç vaxt texnoloji platformalara tətbiq edilməmişdi və onun Telegram-a qarşı işdə istifadəsi ekspertlər üçün sürpriz olub. Politico-ya müsahibə verən ekspertlər bunu “gizli kiber qanun” kimi qiymətləndiriblər.
Poliqon.info