Braziliya Haitiyə beynəlxalq sülhməramlı qüvvə göndərilməsini istəyib

Braziliya hökuməti beynəlxalq ictimaiyyəti BMT Təhlükəsizlik Şurasının 2023-cü il oktyabr tarixli qətnaməsinə uyğun olaraq Haitiyə sülhməramlı qüvvələr göndərməyə çağırıb...

Poliqon xəbər verir ki, bu barədə Reuters Agentliyi məlumat yayıb. Qeyd edək ki, martın 4-də Haitinin paytaxtı Port-o-Prensdə bir neçə yüz məhbusun paytaxt həbsxanasından qaçması ilə əlaqədar fövqəladə vəziyyət elan edilib.

Martın 3-də silahlı qruplar Haitinin Port-o-Prensdəki əsas həbsxanasına hücum edərək bir neçə yüz məhbusu azadlığa buraxıblar. Ertəsi gün ölkə hakimiyyəti paytaxtda fövqəladə vəziyyət və komendant saatı tətbiq edib. Bu gecə, martın 5-də silahlı dəstələr Port-o-Prensin ətraflarında yerləşən Tussen Luvertür Beynəlxalq Hava Limanını ələ keçirməyə cəhd ediblər.

Xatırladaq ki, BMT Təhlükəsizlik Şurası 2 oktyabr 2023-cü ildə Haitiyə sülhməramlı missiyanın göndərilməsi ilə bağlı qətnaməni təsdiqləyib. Sülhməramlə missiya silahlı qruplara qarşı mübarizədə iştirak etməli idi. Sənədə əsasən, missiyanın təşkilində aparıcı rol Keniyaya həvalə edilib.

2004-2017-ci illərdə Haitidə Braziliyanın rəhbərlik etdiyi silahlı missiya fəaliyyət göstərib. Ölkəyə göndərilən kontingentin tərkibinə 2366 hərbi qulluqçu və 2533 polis əməkdaşı, həmçinin mülki işçilər və BMT könüllüləri daxildir. 2017-ci ildə onları BMT-nin yeni missiyasının bir hissəsi olaraq Hindistan hərbi personalı əvəz etdi. 2019-cu ilə qədər Haitidə qalıblar.