Makronun Ukraynaya qoşun göndərmək planının məqsədi nədir?

Poliqon xəbər verir ki, bu barədə The New York Times qəzeti yazıb.

"Onun açıqlamaları Ukraynanın Vaşinqtonda müqavimətlə üzləşdiyi bir vaxta təsadüf edir. Çünki Konqresdəki respublikaçılar çox ehtiyac duyulan maliyyə yardımını əngəlləyir", deyə mətndə qeyd edilir.

Nəşr yazır ki, Avropa liderləri Rusiya ilə münaqişədə Ukraynaya dəstək verməyə hazır olduqlarını nümayiş etdirirlər, çünki döyüşlər uzanır və ABŞ-ın yardımı sual altında qalır.

Qeyd edək ki, Makron fevralın 26-da Yelisey sarayında dövlət başçıları ilə görüşündən sonra Ukraynaya təcili dəstək vermək üçün koalisiya yaradıldığını elan edib. Fransa prezidenti Ukrayna ordusuna orta və uzun mənzilli raketlər və bombalar tədarükünü vəd edib.

Fransa prezidentinin fikrincə, Avropa və Fransa Qərb qoşunlarının Ukraynaya göndərilməsi imkanını istina etməməlidir: "Bu gün quru qoşunlarının rəsmi, nəzərdə tutulan və təsdiq edilmiş şəkildə yerləşdirilməsi ilə bağlı konsensus yoxdur. Amma dinamikada heç nəyi istisna etmək olmaz. Biz Rusiyanın bu müharibədə qalib gələ bilməməsi üçün lazım olan hər şeyi edəcəyik".

Yunanıstan hökumətinin başçısı Kiriakos Mitsotakis isə bildirib ki, Ukraynaya Avropa NATO qüvvələrinin göndərilməsindən söhbət gedə bilməz. Parisdə Ukraynaya dəstək konfransından sonra jurnalistlərə açıqlama verən Mitsotakis qeyd edib ki, Avropa NATO qüvvələri münaqişə zonasına göndərilməyəcək. O, Yunanıstan üçün belə bir problemin olmadığını vurğulayaraq, bunun Avropa NATO ölkələri üçün də belə olduğuna əminliyini ifadə edib.

Baş nazir həmçinin bildirib ki, görüşdə vahid Avropa ordusunun yaradılması məsələsi müzakirə olunmayıb. Mitsotakisin fikrincə, bu məsələnin müzakirəsi Kiyevi dəstəkləmək üçün praktiki səylərdən yalnız yayındıra bilər.

Poliqon.info