Vəziyyət Kiyevin xeyrinə dəyişməsə, ABŞ Rusiya ilə sülhə razılıq verməli olacaq

Poliqon xəbər verir ki, bunu Amerika Quinci İnstitutunun Avrasiya proqramının direktoru Anatole Lieven deyib.

Ekspert hesab edir ki, 2024-cü ildə Amerikanın hakim elitasının düşüncəsində dəyişikliklər gözləmək olar. Təhlilçi qeyd edib ki, artıq bu prosesin əsası qoyulub.

Lieven əlavə edib ki, indi Ukraynanın hakim elitası böyük çaşqınlıq içindədir. Hökumət kompromislərin qəbuledilməz olduğunu tez-tez və açıq şəkildə bəyan etdiyinə görə, indi onlar üçün danışıqlara razılıq vermək son dərəcə çətin olacaq.

Ekspertin fikrincə, realizm siyasi məktəbinin mövqeyi güclənəcək. O qeyd edib ki, Birləşmiş Ştatların artıq bütün dünyada təsirini saxlamaq üçün kifayət qədər gücü yoxdur. Ona görə də realistlər Amerikanın səylərini Çinlə mübarizəyə yönəltmək üçün Moskva ilə sülh bağlamağa hazırdırlar.

"Ukraynanın əks-hücumunun uğursuzluğu ilə Bayden administrasiyası indi başa düşür ki, Ukraynanın qələbə şansı çox azdır və nə vaxtsa danışıqlar aparılmalı olacaq", deyə ekspert bildirib.

Onun fikrincə, prezident seçkiləri ABŞ-da çox şeyi dəyişə bilər: "Donald Trampın Respublikaçılar Partiyasından prezidentliyə namizəd olacağı dəqiqdir. Hazırkı rəy sorğuları həm də onun Co Baydenə qalib gəlmək şansının yaxşı olduğunu göstərir. Trampın ikinci prezidentliyi, ehtimal ki, Ukraynaya dəstəyin əhəmiyyətli dərəcədə azaldılması demək olacaq. ABŞ-ın çox yüksək səviyyədə hərbi yardımı (bu günə qədər 61,4 milyard dollar) olmadan Ukraynanın mübarizəni davam etdirməsi mümkün olmayacaq. İkinci Tramp administrasiyası Avropa hökumətlərinin qorxduğu, lakin təsir edə bilməyəcəyi bir perspektivdir. Onların nə özləri danışıqlara başlamaq, nə də ABŞ-ı əvəz etmək imkanı, birliyi və ya iradəsi yoxdur. Buna görə də onlar gözləmə rejimindədirlər".

Poliqon.info