Türkiyə Misir, Səudiyyə Ərəbistanı, Livan, Liviya və İordaniya liderlərini oktyabrın 28-də İstanbulda Fələstinə dəstək aksiyasında iştirak etmək üçün dəvət edib...
Poliqon xəbər verir ki, bu barədə "Sabah" qəzeti mənbələrə istinadən məlumat yayıb.
Nəşr qeyd edir ki, "İsrailin vəhşiliklərinə diqqət çəkmək və Fələstin məsələsinə dəstək olmaq üçün" böyük aksiyada Türkiyə prezidenti Rəcəb Tayyib Ərdoğandan başqa digər dövlət başçıları da iştirak edə bilər.
"Mitinqə xarici dövlətlərin başçıları, ruhani liderlər dəvət olunub. Səudiyyə Ərəbistanının vəliəhd şahzadəsi Məhəmməd bin Salman və Misir prezidenti Əbdülfəttah əs-Sisi, eləcə də dövlət başçıları səviyyəsində Liviya, Livan və İordaniya dəvət alıb", deyə nəşr yazır.
Ankaranın mitinqdə iştirak üçün liderlərdən razılıq alıb-almadığı açıqlanmır.
Mitinqdə media, idman, incəsənət, biznes, Fələstin diasporunun bir çox nüfuzlu nümayəndələrinin iştirak edəcəyi də bildirilir.
Bundan əvvəl Rəcəb Tayyib Ərdoğan Qərb ölkələrini İsraili qeyd-şərtsiz dəstəklədiklərinə görə beynəlxalq hüququ pozmaqda ittiham etmişdi.
Poliqon.info