Hazırda həbsdə olan Ruben Vardanyan Azərbaycan diplomatlarını terrorla təhdid etmişdi...
Politoloq: “Artıq 20-ci əsrin əvvəlləri deyil, indi dünya tamam başqa cürdür. Buna görə də, mən güman etmirəm ki, erməni terrorizmi yenidə peyda ola bilər”.
“Müasir şəraitdə ASALA terror təşkilatının Qarabağda və yaxud Avropada yenidən peyda olması çox çətin prosesdir”.
Bu sözləri politoloq Qabil Hüseynli son günlərdə erməni lobbisinin daha da aktivləşməsini Poliqon-a şərh edərkən qeyd edib.
Qarabağın tamamının Azərbaycanın nəzarətinə keçməsi və ermənilərin kütləvi şəkildə bölgəni tərk etməsi dünyanın müxtəlif ölkələrində erməni lobbisini “hərəkətə” gətirib, anti-Azərbaycan faliyyətlərini gücləndiriblər. Bilirik ki, bir neçə ay əvvəl hazırda həbsdə olan Ruben Vardanyan Azərbaycan diplomatlarını terrorla təhdid etmişdi.
Azərbaycanın uğurlu anti-terror əməliyyatından sonra erməni diasporunun dəstəyi ilə ASALA terror təşkilatı kimi terror təşkilatları yenidən peyda ola bilərmi?
Mövzunu Poliqon-un əməkdaşı politoloq Qabil Hüseynli ilə müzakirə edib.
Qabil Hüseynli: “Əgər ASALA tipli terror təşkilatı yenidən peyda olarsa, onlara qarşı tədbir görmək elə də çətin deyil”.
İndi dünyanın tamam başqa cür olduğunu vurğulayan politoloq erməni terrorizminin yenidən peyda ola biləcəyini güman etmir:
“Azərbaycanın anti-terror əməliyyatından sonra erməni lobbisinin hərəkətə keçdiyi açıq şəkildə görülür. Bunun bariz nümunəsi kimi, erməni radikalların sentyabrın 29-da ABŞ-ın Cənubi Kaliforniya Universitetində Türkiyənin İctimai Diplomatiyası mövzusunda keçirilən konfransın iştirakçılarına hücum etmələridir. Tədbir iştirakçıları şifahi və fiziki təzyiqlərə məruz qaldılar. Oxşar xəbərlər Livandan da gəldi. Orada da, yenə Azərbaycan səfirliyinə hücum etmək istəyiblər.
Aydın məsələdir ki, bütün bunlar erməni lobbisinin bağladığı hərəkətliliyin başlanğıcıdır. Onların hələ başqa planlar üzərində işlədiyini də düşünmək olar. Amma müasir şəraitdə ASALA terror təşkilatının Qarabağda yenidən peyda olması, uyğunlaşması çox çətin prosesdir.
Əgər ASALA terror təşkilatı kimi terror təşkilatları yenidən peyda olarsa, onlara qarşı tədbir görmək elə də çətin deyil. Artıq 20-ci əsrin əvvəlləri deyil, indi dünya tamam başqa cürdür. Buna görə də, mən güman etmirəm ki, erməni terrorizmi yenidə peyda ola bilər”.
Nərminə UMUDLU
Poliqon.info