“Neftçi” Sankt-Peterburqdakı turnirə 23 futbolçu ilə yollanacaq

“Report”un klubun rəsmi saytına istinadən məlumatına görə, bakılılar təlim-məşq toplanışının ikinci mərhələsi üçün bu gecə saat 12-də çarter reysi ilə Sankt-Peterburqa gedəcəklər.

“Ağ-qaralar” səfərə məşqçilər Vadar Nuriyev, İqor Getman və qapıçılar üzrə məşqçi Yusif Hüseynovun rəhbərliyi altında aşağıdakı futbolçularla yollanacaq:

Qapıçılar: İvan Brkiç, Aqil Məmmədov, Rza Cəfərov.

Müdafiəçilər: Höccət Haqverdi, Solomon Kverkveliya, Azər Əliyev, Azər Salahlı, Ömər Buludov, Elton Əlibəyli, Samir Həsənov, Rüfət Abbasov, Hüseyn Babayev.

Yarımmüdafiəçilər: Kenni Sayef, Eddi İsrafilov, Rəhman Hacıyev, İsmayıl Zülfüqarlı, Kilan Lebon, Ataa Caber, Fərid Yusifli, Ömər Qurbanov.

Hücumçular: Mateus Saldanya, Yeqor Boqomolski, Ağadadaş Salyanski.

“Neftçi” iyulun 1-dən 15-dək Sankt-Peterburqda təşkil olunacaq ənənəvi “Matç TV” turnirində iştirak edəcək. Komanda iyulun 1-də Rusiyanın “Zenit” (20:30), 8-də Serbiyanın “Srvena Zvezda” (20:30), 15-də isə Türkiyənin “Fənərbağça” (15:00) klubu ilə qarşılaşacaq. “Zenit”lə oyun “Qazprom Arena”da, digər iki görüş “Smena” stadionunda olacaq.

Turnir başa çatandan sonra “Neftçi” Rusiyanın paytaxtı Moskvaya yollanaraq yerli “Spartak”la yoldaşlıq oyunu keçirəcək. Bu matç iyulun 18-də “Otkrıtiye Bank Arena”da baş tutacaq. Komanda iyulun 19-da Bakıya qayıdacaq və hazırlığını paytaxtda davam etdirəcək.

Qeyd edək ki, 2023/2024 mövsümündə Azərbaycanı UEFA Konfrans Liqasında təmsil edəcək “Neftçi” qitəmiqyaslı yarışın II təsnifat mərhələsində “Jelezniçar” (Bosniya və Herseqovina) – “Dinamo” (Minsk, Belarus) cütünün qalibi ilə qarşılaşacaq. İlk oyun iyulun 27-də səfərdə, cavab matçı isə avqustun 3-də “Bakcell Arena”da keçiriləcək.

Poliqon.info