Türkiyədə seçkilər... - İkinci turda qalib kim olacaq?

Politoloq: “Keçirilən seçki bir daha Türk xalqının avantürist siyasətçilərə etibar etmədiyini göstərdi”.

““Millət” ittifaqının namizədi K.Kılıcdaroğlunun seçkidə 55-60 faiz səs çoxluğu ilə qələbə qazanacağını bildirənlər PKK və FETO ilə ittifaq etmələrinin cavabını xalq tərəfindən aldı”.

Bu sözləri politoloq Azər Qasımov dünən Türkiyədə keçirilən seçkiləri Poliqon-a şərh edərkən qeyd edib.

Türkiyədə keçirilən prezident və parlament seçkiləri barədə nə düşünmək olar? Artıq bülletenlərin 90 faizindən çoxu sayılıb və Rəcəb Tayyip Ərdoğanın səslərinin 50%-dən aşağı düşməsi seçkilərinin ikinci turunun keçiriləcəyinə dəlalət edir. Ərdoğan ikinci turda qələbə qazana biləcəkmi?

Türkiyədə keçirilən seçkilərin nəticələrini Poliqon-un əməkdaşı politoloq Azər Qasımov ilə müzakirə edib.

Azər Qasımov: “Ərdoğanın “Balkon konuşması” fonunda “Altılı masa”nın bir dəqiqə yarımlıq açıqlaması seçkidən olan gözləntilərdə hansı tərəfin öz istəyinə çatdığını bəlli etdi”.

Ərdoğanın ikinci turda indidən qalib gələcəyini düşünən politoloq Poliqon-a bildirib ki, bu, seçki nəticələrindən çıxan nəticələrə görə Ərdoğanın qələbəsi qəti və dəyişilməz görünür:

“Keçirilən seçki bir daha Türk xalqının avantürist siyasətçilərə etibar etmədiyini göstərdi. Parlament seçkisini səs çoxluğu həddini keçməklə qazanan AKP və MHP “Cümhur ittifaqı”, prezident seçkilərindən də ikinci turda qələbə ilə çıxmaq üçün böyük şanslar əldə etdi.

“Millət ittifaqı”nın namizədi K.Kılıcdaroğlunun seçkidə 55-60 faiz səs çoxluğu ilə qələbə qazanacağını bildirənlər isə PKK və FETO ilə ittifaq etmələrinin cavabını xalq tərəfindən aldı. Türk xalqı 50 ildir onların övladlarını şəhid edən bir təşkilatla işbirliyi edən CHP-nin yönəticilərinin arzularını ürəklərində qoydu.

İkinci turda R.T.Ərdoğanın asanlıqla Sinan Oğanın səslərinin yarısını alsa belə, qalib olacağı şübhəsizdir.

Azər Qasımov: “Seçkilərin ikinci tura qalmasının özü Türkiyə demokratiyasının qələbəsi oldu”.

İttifaqların rəhbərlırinin seçki sonrası çıxışları əslində hər şeyi göstərdi. Ərdoğanın “Balkon konuşması” fonunda “altılı masa”nın bir dəqiqə yarımlıq açıqlaması seçkidən olan gözləntilərdə hansı tərəfin öz istəyinə çatdığını bəlli etdi.

Seçkilərin ikinci tura qalmasının özü Türkiyə demokratiyasının qələbəsi oldu. Çoxlarının seçkilər saxtalaşdıracaq deməsinə rəğmən prosesin həm sakit, həm də ciddi qayda pozuntusu olmadan keçməsi bir daha gərginlik yaratmaq istəyən, seçkini pozmaq istəyən qüvvələrin Türkiyə dövlətinin zəkası qarşısında məğlub olduğunu göstərdi.

Ərdoğan ikinci turda indidən qalibdir. Bu, seçki nəticələrindən çıxan nəticələrə görə qəti və dəyişilməz görünür”.

Nərminə UMUDLU
Poliqon.info