Baş nazirə qarşı korrupsiya şübhəsi...

Böyük Britaniyanın baş nazirinin həyat yoldaşı Akşata Murti dövlətdən təxminən 350 min funt sterlinq yardım alan şirkətdə paya sahibdir.

Poliqon xəbər verir ki, bu barədə Britaniyanın The Timesnəşri məlumat yayıb. Keçən il şirkət “Innovate UK” Dövlət agentliyindən 437 min dollar qrant alıb.

Birinci xanımın nəzarətində olan “Catamaran Ventures” investisiya şirkətinin təhsil texnologiyaları startapı “Study Hall”da paya malik olması “Şirkətlər Evi”nin dövlət reyestrindəki qeydlərlə sübut olunur.

Britaniya nəşri qeyd edir ki, reyestrə görə, 2022-ci ildə şirkət innovativ məhsul və ya xidmətlər inkişaf etdirən sahibkarlara vəsait və dəstək verən “Innovate UK” Dövlət Agentliyindən 349,976 funt sterlinq (437,000 dollar) qrant alıb.

Qeyd edək ki, daha əvvəl Böyük Britaniya parlamenti Sunakın həyat yoldaşının uşaq baxımı şirkətində payına görə maliyyə maraqlarını bəyan etməsi məsələsi ilə bağlı ona qarşı təhqiqata başlandığını elan edib.

Xatırladaq ki, Rişi Sunakın ailəsinin sosial vəziyyəti ictimaiyyət tərəfindən tez-tez tənqid olunur. Tənqidlər, ilk növbədə, hindli milyarderin qızı, həyat yoldaşı Akşata Murti ilə bağlıdır. Sunak Baş nazir postuna gəlməmişdən əvvəl məlum olub ki, onun həyat yoldaşı Hindistan vətəndaşlığından imtina etməyib və beləliklə, Böyük Britaniyanın rezidenti olmadığı üçün digər ölkələrdə aldığı biznes gəlirlərinə görə ağır vergilərdən yayına bilib.

Poliqon.info