İran və Ermənistanın Azərbaycana əsassız iddiaları və sülhdən qaçınmalar...

Politoloq: “Məlum olan odur ki, Ermənistan və onun dəstəkçisi molla rejimi Azərbaycan ordusundan çox qorxurlar”.

“Gərginlik ehtimalı həmişə olub, indi də qalır. Sülh olmayana kimi də böyük ehtimalla gərginlik artacaq”.

Bu sözləri politoloq Azər Qasımov İran və Ermənistanın Azərbaycana qarşı dediyi əsassız iddiaları Poliqon-a şərh edərkən qeyd edib.

Xəbər verdiyimiz kimi Paşinyan martın 14-də keçirdiyi mətbuat konfransı zamanı ölkəmizə qarşı əsassız iddialar səsləndirdi. Erməni “Telegram” kanalları Azərbaycan Silahlı Qüvvələrinin Ermənistan sərhəddə və Qarabağa toplanması barədə iddialar yaydı. Maraqlıdır ki, eyni anda İran mediası da heç bir əsas olmadan eyni iddialarla çıxış edib. Bu ölkə mediası iddia edir ki, İslam İnqilabı Keşikçiləri Korpusu Azərbaycanın böyük qoşun kolonlarının hərəkətini qeydə alıb.

Bəs İran və Ermənistanın bu iddiaları indi yaymaqda məqsədləri nədir və Ermənistanla sərhəddə yeni gərginlik ehtimalı varmı?

Mövzunu Poliqon.info-un əməkdaşı politoloq Azər Qasımov ilə müzakirə edib.

Azər Qasımov: “Azərbaycan dövləti öz ərazisinin suverenliyini tam bərpa etmək üçün hər vasitən istifadə edəcəyi şübhəsizdir”.

Əgər Azərbaycan Ermənistana son bir şans veribsə, Ermənistanın bunu doğru anlamalı olduğunu vurğulayan politoloq Poliqon-a açıqlamasında qeyd edib ki, Ermənistan bundan sui-istifadə edib öz vəziyyətini daha da ağırlaşdırmamalıdır:

“Məlum olan odur ki, Ermənistan və onun dəstəkçisi molla rejimi Azərbaycan ordusundan çox qorxurlar. Gözlərinə hər yerdə Azərbaycan əsgəri görünür. Azərbaycan öz ərazisində istədiyi mövqedə əsgər yerləşdirə bilər. İndi bunu nə məqsədlə edirik, bu, Azərbaycanın siyasi-hərbi rəhbərliyinin bildiyi işdir. Əgər edirlərsə, deməli buna ehtiyac var.

Gərginlik ehtimalı həmişə olub, indi də qalır. Sülh olmayana kimi də böyük ehtimalla gərginlik artacaq. Azərbaycan dövləti öz ərazisinin suverenliyini tam bərpa etmək üçün hər vasitən istifadə edəcəyi şübhəsizdir. Hələ ki, bunu sakitliklə etmək istəyirik.

Görünən odur ki, Ermənistan bu xoş niyyəti yaxşı anlamır və İran molla rejimi kimi ikiüzlü hakimiyyətin təhriklərinə aldanıb, vaxt uzatmaqla məşğuldur. Əgər Azərbaycan Ermənistana son bir şans veribsə, Ermənistan bunu doğru anlamalıdır. Bundan sui-istifadə edib öz vəziyyətini daha da ağırlaşdırmamalıdır.

Azərbaycanın ordusu həmişə hazır vəziyyətdədir. Bu, Azərbaycanın son anda məsələni hərbi yolla həll edəcəyi anlamına gəlir. Ermənistan bunu istəmirsə, sülhə gəlsin”.

Nərminə UMUDLU
Poliqon.info