Avropa İttifaqı (Aİ) məhkəməsi istifadəçilərin yalan olduğunu sübut etdiyi bütün məlumatları Google-un axtarış nəticələrindən silmək qərarına gəlib...
PİA.az Türkiyə mətbuatına istinadla xəbər verir ki, baş ofisi Lüksemburqda yerləşən Aİ-nin ən yüksək orqanlarından olan Avropa Ədalət Məhkəməsi Google-a qarşı yalan olduğu iddia edilən məzmunun silinməsi ilə bağlı qərar çıxarıb.
Qərarda deyilir:
“Açıq-aşkar yalan olduğu sübut edilə bilən məlumatlar axtarış sistemi tərəfindən silinməlidir”.
Məhkəmə saxta məzmunu sübut etmək üçün istifadəçinin məsələ ilə bağlı qərar verməsi əvəzinə, ağlabatan sübutların kifayət edəcəyinə qərar verib.
İnvestisiya şirkətinin iki rəhbəri Google-dan onlar haqqında edilən axtarışlarda şirkətlərinin investisiya modelini tənqid edən bəzi məqalələrə keçid verən axtarış nəticələrinin əsassız iddialar olduğunu əsas gətirərək silinməsini istəyib. Həmin şəxslər, həmçinin, Google-da şəkil axtarışında adları daxil edilərkən görünən miniatür şəkillərinin silinməsini tələb ediblər. Google məqalədə yer alan məlumatların doğru olub-olmadığını bilmədiyini əsas gətirərək məqalə və fotoşəkillər tələbini rədd edib. Məsələ ilə bağlı Almaniyada hüquqi proses başlanıb.
Qeyd edək ki, Almaniya Federal Məhkəməsi bu işi Aİ-nin unudulmaq hüququ və məlumatların qorunması qaydaları çərçivəsində şərh edilməsi üçün Avropa Ədalət Məhkəməsinə təqdim edib.
pia.az