Ukraynaya yüklərin çatdırılması üçün logistik humanitar mərkəz açılıb

Ukraynaya Avropa İttifaqı ölkələrindən göndərilən humanitar yüklərin qəbulu üzrə “Eurocar” zavodunun bazasında mərkəz fəaliyyətə başlayıb.

“Report” “UNİAN”a istinadən xəbər verir ki, bu barədə Ukraynanın İnfrastruktur Nazirliyi məlumat yayıb.

“Zarkarpatye vilayətinin hakimiyyət orqanları “Ukrzaliznitsa” ilə birlikdə ölkənin ən çox zərər çəkmiş ərazilərinə - Kiyev, Xarkov, Dnepr, Zaporojye və Odessaya humanitar yüklər çatdıracaq”, - nazirliyin məlumatında deyilir.

Mərkəzin yerləşdiyi məkan yüklərin dəmir yolu ilə qəbulu və göndərilməsinə imkan yaradır, çünki burada həm Avropa (1 435), həm də Ukrayna (1 520) dəmir yolu xətti var. Mərkəzdən ilk humanitar yük dəmir yolu ilə Xarkova göndərilib.

Prioritet yük növləri dərmanlar, gigiyena məhsulları, tez xarab olmayan qida məhsulları, paltarlar, su, uşaq məhsulları (qida, bezlər və s.), yataq dəstləri və döşəklərdir.

pia.az