Şadlıq saraylarından çıxan tüstü ətrafda yaşayan sakinləri narahat edir
Bu mənzərə daha çox şadlıq evlərinin sıx yerləşdiyi Nizami, Xətai və Binəqədi rayonlarında hökm sürür. Araşdırmamız zamanı bəzi obyektlərin sahibləri tüstünün təmizlənməsi üçün yeni avadanlıqlar quraşdırdıqlarını bildirsələr də, restoranlardan çıxan tüstü başqa təəssürat yaradır.
Məsələn, Xətai rayonunda yerləşən "Təbrik" şadlıq sarayından tüstü yüksələrək ətrafa yayılır.
Eyni mənzərə hər axşam Nizami rayonu Bəkir Çobanzadə küçəsində, eləcə də Binəqədi rayonunun şadlıq evləri cəmləşən küçələrində də yaşanır.
Ətrafa yayılan tüstü ekologiyaya zərər verməklə yanaşı, sakinlərin də narahatlığına səbəb olur.
Problemlə bağlı şadlıq evinin meneceri Elçin Abbasov bildirdi ki, obyektdə müasir standartlara uyğun olan təmizləmə cihazları quraşdırılıb. Müəyyən zaman keçdikdən sonra həmin avadanlıqların filtri yenilənir. Elə tüstünün normadan artıq çıxması da bu zamana təsadüf edib. Elçin Abbasov bildirdi ki, artıq yeni filtrlərin quraşdırılması başa çatmaq üzrədir və sabahdan ətrafda yaşayan vətəndaşlar heç bir tüstü müşahidə etməyəcəklər.
Ekologiya və Təbii Sərvətlər Nazirliyi də mövqeyini açıqlayıb. Nazirliyin Milli Monitorinq Departamentinin direktoru Ramal Bağırov bildirib ki, paytaxtın müxtəlif yerlərində son 10 gündə avadanlıq quraşdırılsa da, normadan artıq tüstü xaric edən 10-dan çox şadlıq sarayı müəyyən edilib və onlara vəziyyəti dəyişmək üçün 24 saat müddətinə məcburi göstəriş verilib. Elə "Təbrik" restoranı da xəbərdarlıq edilən obeyktlərin arasındadır.
Nazirlik rəsmisi onu da bildirib ki, Bakı, Abşeron və Sumqayıtda 600-dən çox şadlıq evi var və onların hamısını bir gündə monitorinq etmək fiziki olaraq mümkün deyil.
Qeyd edək ki, bu məsələ uzun müddətdir gündəmdədir. Görünən odur ki, restoranlar qoyulan bu tələbləri yerinə yetirməkdə bir o qədər də həvəsli deyilər. Bunun narahatlığını isə sakinlər çəkir.
Ekologiya və Təbii Sərvətlər Nazirlyi hər dəfə bu məsələ gündəmə gələndə monitorinqin aparıldığını açıqlayır. Nəticə isə dəyişmir. Görünür, ya monitorinqlər düzgün aparılmır, ya da şadlıq evlərinə quraşdırılan avdanlıqlar standartlara cavab vermir.
Xezerxeber.az mövzu ilə bağlı daha ətraflı videomaterialı təqdim edir:
pia.az