Netanyahu Azərbaycan XİN rəhbərini qəbul edib, regional problemlər müzakirə edilib - Yenilənib

29 mart 2023-cü il tarixində Azərbaycan Respublikasının xarici işlər naziri Ceyhun Bayramov İsrail Dövlətinə rəsmi səfəri çərçivəsində Baş nazir Binyamin Netanyahu tərəfindən qəbul edilib.

Poliqon.info xəbər verir ki, bu barədə XİN məlumat yayıb.

Baş nazir Binyamin Netanyahu ilk öncə Azərbaycan Respublikasının Prezidenti cənab İlham Əliyevə öz salamlarını çatdırmağı xahiş edib. Azərbaycana səfərlərini məmnunluqla xatırlayıb. Azərbaycanın İsraildə Səfirliyinin açılması münasibətilə təbriklərini çatdırıb. Baş nazir İsrailin Azərbaycan ilə əməkdaşlığın daha da inkişaf etdirilməsində maraqlı olduğunu bildirib.

Nazir Ceyhun Bayramov ötən il ölkələrimiz arasında diplomatik münasibətlərin qurulmasının 30-cu ildönümünün qeyd edildiyini məmnunluqla xatırlyıb və Azərbaycan Respublikasının İsrail Dövlətində Səfirliyinin təsis edilməsinin münasibətlərin yeni mərhələyə qədəm qoyduğunun nümunəsi olduğunu vurğulayıb.

Görüş zamanı həmçinin Azərbaycan və İsrail arasında ikitərəfli münasibətlərin hazırki səviyyəsi, münasibətlərin inkişafı perspektivləri, təhlükəsizlik, iqtisadi əlaqələr və digər sahələrdə əməkdaşlığın müxtəlif aspektləri müzakirə olunub

***

İsrailin Baş naziri Benyamin Netanyahu Təl-Əvivdə Azərbaycanın xarici işlər naziri Ceyhun Bayramovla görüşüb və onu səfirliyin açılması münasibətilə təbrik edib.

Poliqon.info xəbər verir ki, bu barədə Azərbaycan XİN məlumat yayıb.

Tərəflər Azərbaycan və İsrail arasında ikitərəfli və çoxtərəfli əməkdaşlıq, eləcə də regiondakı vəziyyət ətrafında fikir mübadiləsi aparıblar.

***

APA xəbər verir ki, bu barədə Baş nazirin tvitter səhifəsində paylaşım edilib.

Bildirilib ki, Baş nazir Benyamin Netanyahu bu gün Azərbaycanın xarici işlər naziri Ceyhun Bayramovla görüşüb və Azərbaycanın İsraildə səfirliyinin açılması və bu ölkədən İsrailə ilk səfirin təyin olunması münasibətilə onu təbrik edib.

Tərəflər ümumi regional təhlükəsizliyi və İranın regional sabitliyə yaratdığı təhlükəni müzakirə ediblər.

Baş nazir Netanyahu iki ölkənin yaxın münasibətlərini yüksək qiymətləndirib.

Tərəflər bir sıra sahələrdə ikitərəfli əməkdaşlığın genişləndirilməsi potensialını müzakirə ediblər.

Poliqon.info