İran bütün vasitələrlə “Hizbullah”ı İsraildən müdafiə edəcək

Poliqon xəbər verir ki, bunu İranın Ali dini liderinin müşaviri, ölkənin Beynəlxalq Əlaqələr üzrə Strateji Şurasının rəhbəri Kamal Xarazi deyib.

“Bütün Livan xalqı, ərəb ölkələri və “müqavimət oxu”nun üzvləri İsrailə qarşı Livanı dəstəkləyəcəklər. Ola bilsin ki, müharibə bütün regiona yayılsın, bütün ölkələr, o cümlədən İran da iştirak etsin. Belə bir vəziyyətdə “Hizbullah”ı hər vasitə ilə dəstəkləməkdən başqa çarəmiz qalmaz”, deyə Kamal Xarazi Financial Times nəşrinə müsahibəsində deyib.

Bununla belə, Xarazi əlavə edib ki, müharibənin genişləndirilməsi İranın maraqlarına cavab vermir.

Xatırladaq ki, iyunun 18-də İsrail Müdafiə Qüvvələri “Hizbullah”ının davam edən hücumları səbəbindən Livana hücum üçün döyüş planının təsdiqləndiyini elan edib.

Öz növbəsində “Hizbullah” lideri Həsən Nəsrullah Qəzza zolağında müharibə fələstinlilərin xeyrinə bitməsə, İsrailə qarşı genişmiqyaslı hərbi əməliyyatlara başlayacaqlarını elan edib.

İyunun sonundan başlayaraq xarici vətəndaşlar Livanı tərk etməyə başlayıblar.

Poliqon.info