Gürcüstan DTX: Aksiyalarda təxribatları xarici dövlətlər maliyyələşdirir...

Poliqon xəbər verir ki, bunu ölkənin Dövlət Təhlükəsizlik Xidməti (DTX) bildirib.

"Xarici ölkələr Gürcüstanda "xarici agentlər haqqında" qanuna qarşı keçirilən etiraz aksiyalarında təxribatları maliyyələşdirir", deyə Dövlət Təhlükəsizlik Xidməti qeyd edib.

Xidmət etirazçıları təxribatlara əl atmamağa, hüquq-mühafizə orqanlarını isə ölkədə iğtişaşların və vətəndaş qarşıdurmasının qarşısını almaq üçün təcili tədbirlər görməyə çağırıb.

Mayın 1-də Gürcüstan parlamenti "xarici agentlər haqqında" qanun layihəsini ikinci oxunuşda qəbul edib. Bununla əlaqədar Tiflisdə hər gün mitinqlər keçirilir. Bu ilin aprelində hakim Gürcü Arzusu Partiyası xarici agentlər haqqında qanun layihəsini rəsmi olaraq parlamentə yenidən təqdim edib. "Xarici təsirin şəffaflığı haqqında" adlı qanun layihəsində "xarici təsir agenti" ifadəsi əvəzinə "xarici dövlətin maraqlarını güdən təşkilat" ifadəsi işlədilir.

Qanun layihəsi gəlirləri, xüsusən də 20%-dən çoxu xaricdən əldə edilən qeyri-kommersiya hüquqi şəxslərin və KİV-lərin qeydiyyatını nəzərdə tutur. Layihəyə əsasən, "xarici qüvvələrin maraqlarını təbliğ edən təşkilat" hesab edilən hər kəs dövlət reyestrində qeydiyyatdan keçməlidir. Qeydiyyat zamanı alınan gəliri əks etdirmək, həmçinin bəyannamə doldurmaq lazımdır. Qeydiyyatdan və ya bəyannamə doldurmaqdan imtina 25 min lari (təxminən 9,5 min dollar) məbləğində cərimə ilə cəzalandırılacaq.

Bu layihənin əleyhdarları Rusiyadan nümunə götürərək qanunvericiliyə xarici agent anlayışının daxil edilməsinə görə onu Rusiya qanunvericiliyinin analoqu adlandırırlar.

Poliqon.info