Hindistanda keçirilən G-20 zirvə toplantısı başa çatıb...
Siyasi-şərhçi: “Hindistanın paytaxtında keçirilən G-20 sammiti deyərdim ki, bəlkə də, tarixi bir sammit oldu”.
“Bundan sonra bütün Avrasiya bölgəsində, ilk növbədə də Yaxın Şərqdə faktiki olaraq indiyə qədər mövcud olmuş və həyata keçirilməsi nəzəri baxımdan müzakirə olunan, planlaşdırılan bütün geosiyasi layihələr arxa plana keçdi”.
Bu sözləri siyasi-şərhçi Ərəstun Oruclu öz işini başa vuran G-20 zirvə toplantısını Poliqon-a şərh edərkən qeyd edib.
Xəbər verdiyimiz kimi Hindistanda keçirilən G-20 zirvə toplantısı öz işini başa çatdırdı. Dünyada baş verən geosiyasi kataklizmlər fonunda G-20 zirvə toplantısını necə dəyərləndirmək olar?
G-20 zirvə toplantısında alınan qərarları Poliqon-un əməkdaşı siyasi-şərhçi Ərəstun Oruclu ilə müzakirə edib.
Ərəstun Oruclu: “Memoranduma əsasən bu ölkələr Hindistan, Yaxın Şərq, Avropa iqtisadiyyat və nəqliyyat kommunikasiya dəhlizinin yaradılmasına qərar verdilər. Bu da olduqca mühüm bir qərardır”.
Bu layihənin baş tutacağı halda faktiki olaraq dünyanın iki güclü ölkəsi - Rusiya və Çinin - çox böyük, qlobal bir layihədən kənarda qalacaqlarını nəzərə çatdıran ekspert Poliqon-a bildirib ki, artıq Rusiya və Çinin dünyada sözünün çəkisi də yetərli olmayacaq:
“Hindistanın paytaxtında keçirilən G-20 sammiti deyərdim ki, bəlkə də, tarixi bir sammit oldu. O mənada ki, birinci bu sammitdə həmin iyirmiliyə daxil olan iki ölkə iştirak etmədi. Bu ölkələr Çin və Rusiya idi. Bu da faktiki olaraq Qərbin Yaxın Şərqdəki müttəfiqləri və Hindistan birlikdə de-fakto olaraq Rusiya və Çinə qarşı müəyyən mənada plan işləyib hazırlanmasına şərait yaratdı.
Buradan çıxan əsas nəticə də, o oldu ki, Hindistanın, ABŞ-ın, Avropanın üç ölkəsinin - Almaniya, İtaliya, Fransanın, ayrıca Avropa Birliyinin Səudiyyə Ərəbistanı və Birləşmiş Ərəb Əmirliklərinin iştirakı ilə bir memorandum imzalandı. Həmin memoranduma əsasən bu ölkələr Hindistan, Yaxın Şərq, Avropa iqtisadiyyat və nəqliyyat kommunikasiya dəhlizinin yaradılmasına qərar verdilər. Bu da olduqca mühüm bir qərardır. Ona görə ki, bundan sonra bütün Avrasiya bölgəsində, ilk növbədə də Yaxın Şərqdə faktiki olaraq indiyə qədər mövcud olmuş və həyata keçirilməsi nəzəri baxımdan müzakirə olunan, planlaşdırılan bütün geosiyasi layihələr arxa plana keçdi.
Ərəstun Oruclu: “Belə bir memorandumun imzalanması G-20 sammitinin nə dərəcədə əhəmiyyətli olduğunu göstərdi”.
Bu layihə baş tutacağı halda faktiki olaraq dünyanın iki güclü ölkəsi - Rusiya və Çin - çox böyük, qlobal bir layihədən kənarda qalacaq. Bu da o deməkdir ki, həmin ölkələrin dünyada sözünün çəkisi də yetərli olmayacaq. Bu mənada belə bir qərarın qəbul olunması, belə bir memorandumun imzalanması G-20 sammitinin nə dərəcədə əhəmiyyətli olduğunu göstərdi.
Onu da qeyd edim ki, G-20 sammitində başqa qərarlar da qəbul olundu, başqa müzakirələr də aparıldı. Amma mən hesab edirəm ki, ən önəmli məsələ bu idi. Çünki bu məsələ dünyanın bütün geosiyasi mənzərəsini dəyişir”.
Nərminə UMUDLU
Poliqon.info