Conson: Bu, Ağ Evə bir siqnal idi...

Poliqon xəbər verir ki, ABŞ Konqresinin Nümayəndələr Palatasının spikeri Ceyms Maykl Conson iki ilə yaxındır Rusiyanın hərbi işğalını dəf edən Ukraynaya yeni hərbi yardımı dəstəkləməkdən imtina etməsini izah edib.

Conson CBS media şirkətinə müsahibəsində bildirib ki, tranşın əleyhinə səs verməklə o, Ağ Evə “siqnal göndərib” və heç də ukraynalıları dəstəkləməkdə qətiyyətsizlik nümayiş etdirməyib.

Respublikaçı spiker hesab edir ki, Ağ Evin davranışı Amerika xalqı üçün aydın deyil.

“Ukraynada müharibənin son mərhələsi nədir? Bizim strategiyamız nədir? Məqsəd nədir?” deyə Konqresin aşağı palatasının spikeri sual edib.

Bundan əlavə, Conson tranşın təsdiqlənəcəyi təqdirdə ABŞ hakimiyyətinin vəsaitlərin düzgün xərclənməsinə necə nəzarət edəcəyi ilə də maraqlanıb.

Siyasətçi ölkənin dövlət borcunun tarixdə ilk dəfə olaraq 34 trilyon dolları keçdiyini vurğulayıb.

“Kiyevə yardım üçün pul göndərməklə Vaşinqton əslində onu başqa yerdən borc götürməli olacaq”, deyə respublikaçı siyasətçi qeyd edib. Conson əlavə edib ki, Respublikaçılar Vaşinqtondan yazılı şəkildə açıq cavablar istəyib, lakin bu cəhdlər uğursuz alınıb.

Qeyd edək ki, ABŞ-ın Ukraynaya hərbi yardımının yeni maliyyələşdirilməsi yalnız Konqresin təsdiqi ilə mümkündür. Lakin Demokratlar və Respublikaçılar hələlik bu məsələdə konsensus əldə etməyiblər.

Ağ Ev Kiyevə kömək üçün 61,3 milyard dollar istəyir. Respublikaçılar daxili problemlərin həllinə, o cümlədən ABŞ-ın Meksika ilə sərhədinin möhkəmləndirilməsinə və qeyri-qanuni miqrasiyanın miqyasının məhdudlaşdırılmasına əlavə vəsait ayırmadan bu tranşla razılaşmaqdan imtina edirlər.

Poliqon.info