ASAN Beynəlxalq Assosiasiyası dövlətlərinin ekspertlərinin Bakıda görüşü olub -Foto

APA-nın məlumatına görə, məqsəd Assosiasiyasının Nizamnamə layihəsinin müzakirəsi və sənədin imzalanması məqsədi ilə üzv ölkələrin dövlətdaxili prosedurlarına ötürülməsidir. Dövlət xidmətləri göstərən qurumların ASAN Beynəlxalq Assosiasiyasının yaradılması barədə Niyyət Bəyannaməsi 2019-cu ilin iyun ayında Bakıda təşkil olunmuş BMT-nin Dövlət Xidmətləri Forumu çərçivəsində imzalanıb. Bəyannaməni Azərbaycan, Birləşmiş Ərəb Əmirlikləri, Əfqanıstan, İndoneziya, Mərakeş, Monteneqro, Türkiyə və Uqandanın dövlət xidmətləri göstərən müvafiq nazirliklərinin rəhbərləri imzalayıblar.

Assosiasiyanın Nizamnamə layihəsi Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ekspert qrupu tərəfindən hazırlanaraq müvafiq ölkələrə baxılmaq üçün göndərilib. Niyyət Bəyannaməsini imzalamış ölkələr tərəfindən müsbət rəy alındıqdan sonra həmin ölkələr tərəfindən sənədin ətraflı müzakirəsi məqsədi ilə yüksək səviyyəli ekspertlərin Azərbaycanda keçiriləcək iclasda toplanması qərarlaşdırılıb. Ekspertlərin Bakı görüşündə, həmçinin 2020-ci ildə təşkilatın Nazirlər Görüşünün yerini müəyyən etmək, qurumun təşkilatlanmasının hüquqi prosedurlarının növbəti mərhələlərini müzakirə etmək nəzərdə tutulur.

ASAN Beynəlxalq Assosiasiyasının yaradılmasında məqsəd üzv ölkələr arasında dövlət xidmətlərinin səmərəli idarə edilməsi sahəsində yaranan aktual problemlər və müasir çağırışların həll edilməsi yolları və vasitələrinin müzakirəsidir. Həmçinin strategiya və onun reallaşdırılması çərçivəsini yaratmaq məqsədilə mütəxəssislər və ekspertlərin institusional şəbəkəsini təşkil etmək, habelə dövlət xidmətlərinin gələcək inkişaf istiqamətlərini müəyyən etmək əsas prioritetlərdir.

pia.az