ABŞ Yəməndə Husilərə məxsus iki ballistik raketi məhv edib

Poliqon xəbər verir ki, bu barədə ABŞ Silahlı Qüvvələrinin Mərkəzi Komandanlığı X sosial şəbəkəsində yaydığı məlumatda bildirilir. Hücum nəticəsində husilərin Qırmızı dənizdə gəmilərə hücum etməyi planlaşdırdığı iki ballistik raket məhv edilib.

“Yanvarın 24-də Səna vaxtı ilə təxminən 02:30-da ABŞ Mərkəzi Komandanlığı qüvvələri Husilərin iki gəmi əleyhinə raketinə hücum edib”, deyə komandanlığın məlumatlnda deyilir.

Qeyd edək ki, yanvarın 12-də ABŞ Böyük Britaniyanın dəstəyi ilə Yəməndə husilərin mövqelərinə hücum edib. Husilərə görə, nəticədə 5 əsgər həlak olub. ABŞ-ın zərbələri yanvarın 13 və 14-də də davam edib. Yanvarın 18-də ABŞ ordusu Husilərin gəmi əleyhinə raketlərinə hücum edib. ABŞ Yəmən hədəflərinə hücumları beynəlxalq gəmilərin Qırmızı dənizdə atəşə tutulması ilə izah edib.

Yanvar ayında husilər ABŞ-ın atəşinə cavab olaraq Amerika gəmilərinə dəfələrlə hücum ediblər. Belə ki, yanvarın 18-də Amerikanın Genco Picardy gəmisinə, yanvarın 19-da isə Chem Ranger tankerinə hücumlar edilib. Husilərin lideri Abdel Malek əl-Husi ABŞ və Britaniya gəmilərinə hücumları davam etdirəcəyini vəd edib.

Poliqon.info