ABŞ dövlət katibinin siyasi məsələlər üzrə müavini Viktoriya Nuland bildirib ki, Rusiyanın S-400 zenit-raket kompleksləri (ZRS) ilə bağlı məsələnin həlli mümkün olarsa, ABŞ Türkiyəni F-35 qırıcı proqramına qaytarmağa hazırdır...
Poliqon xəbər verir ki, o, bu barədə "CNN Türk"ə müsahibəsində danışıb.
"Bu gün bir sıra müzakirələrimiz oldu. Aydındır ki, biz istədiyimiz S-400 məsələsini həll edə bilsək, ABŞ Türkiyəni yenidən F-35 ailəsinə qəbul etməkdən məmnun olacaq. Amma biz əvvəlcə bu məsələni həll etməliyik və eyni zamanda Türkiyəni güclü hava hücumundan müdafiə sistemi ilə təmin etməliyik", deyə Nuland bildirib.
O əlavə edib ki, Ankara İsveçin NATO üzvlüyünü ratifikasiya etdikdən sonra ABŞ və Türkiyə iqtisadi və təhlükəsizlik məsələlərində birgə işləməyə qayıdıb.
Nuland həmçinin bildirib ki, ABŞ Suriyadan qoşunlarını çıxarmaq niyyətində deyil: "İlk növbədə, vəziyyəti aydınlaşdırım: Birləşmiş Ştatlar Suriyadan qoşunlarını çıxarmır".
Nuland qeyd edib ki, İstanbulda kilsəyə edilən son hücum İŞİD-in hələ də aktiv olduğunu göstərdi, ona görə də ABŞ Türkiyə ilə əməkdaşlıq edərək istər İraqda, istərsə də Suriyada terrorla mübarizəni davam etdirməlidir.
O, həmçinin İordaniyada ABŞ qüvvələrinə hücumları xatırladıb və bildirib ki, bu, həm də ABŞ-Türkiyə əməkdaşlığının gücləndirilməsinin vacibliyini göstərir.
Qeyd edək ki, bundan əvvəl ABŞ-ın qoşunlarının Suriyadan tamamilə çıxarılması imkanını ciddi şəkildə nəzərdən keçirdiyi bildirilirdi. "Foreign Policy"nin məlumatına görə, ABŞ prezident administrasiyası Suriyada missiyanı artıq zəruri hesab etmir və hələlik yekun qərar verməsə də, bölmələrin ölkədən çıxarılmasının vaxtı və üsullarını müzakirə edir.
Poliqon.info