"Bu gün də Qarabağ probleminin alternativ həlli ehtimalı var" - Vardan Oskanyan

Poliqon "Sputnik Ermənistan"a istinadən xəbər verir ki, 1998-2008-ci illərdə XİN-ə rəhbərlik etmiş diplomat baş nazirin ona ünvanladığı tənqidlərlə bağlı videomüraciət yayıb.

Oskanyanın sözlərinə görə, o, əvvəllər bu görüş barədə heç vaxt danışmayıb. Diplomatın qeyd edib ki, müharibə günlərində vəziyyətlə bağlı bəzi təkliflərlə Paşinyana məktub göndərib:

"Müharibədən sonra Nikol Paşinyanla görüşdüm. Bu barədə əvvəllər danışmamışam, ilk dəfədir ki, danışıram. Müharibədən sonrakı vəziyyətdə bir neçə təklif verdim, onları kağıza yazdım və təqdim etdim. O, onları oxudu, təşəkkür etdi. Niyə indi bu haqda danışıram? Ona görə ki, hamı əmin olsun, mənim heç vaxt nəsə haqqında spekulyasiya etmək fikrim olmayıb”.

Keçmiş nazir əmindir ki, bu gün də Qarabağ probleminin alternativ həlli ehtimalı var: "Mövcud vəziyyətə alternativin olmaması ilə bağlı deyilənlər mifdir. Mən bu məsələni baş nazirlə müzakirə etməyə hazıram".

Qeyd edək ki, bundan əvvəl Paşinyan sabiq naziri tənqid edərək, onu Qarabağla bağlı danışıqlarda çaşqınlıq yaratmaqda ittiham edib. O, həmçinin eks-naziri 44 günlük müharibədə məğlubiyyətin səbəblərini araşdırmaq, 2018 və ya 2019-cu ildə ona nə məsləhət vermək istədiyini izah etmək üçün komissiyaya gəlməyə dəvət edib.

Poliqon.info