Ukrayna prezidenti Volodimir Zelenski amerikalı həmkarı Co Baydeni Alyansın iyulun 11-12-də Vilnüsdə keçiriləcək sammitində ölkəsini NATO-ya üzv olmağa dəvət etməyə çağırıb...
Poliqon xəbər verir ki, bu barədə “Klymenko Time” portalı məlumat yayıb.
“ABŞ prezidenti NATO-dakı gələcəyimizi dəstəkləyir, lakin indi dəvət Ukrayna əsgərləri üçün böyük motivasiya olardı. Ukraynanın indi dəvət alması çox vacibdir”, deyə Zelenski bildirib.
Zelenski də daxil olmaqla, Ukrayna siyasətçiləri son bir neçə həftədə Ukraynaya qarşıdakı sammitdə NATO üzvlüyünün “yol xəritəsi”nin verilməsini istəyir. Eyni zamanda, Almaniya kansleri Olaf Şolts bu həftə bəyan edib ki, Ukraynanın NATO-ya daxil olması onun ərazisində hərbi əməliyyatlar getdikcə mümkün deyil.
Qeyd edək ki, NATO 2008-ci ilin aprelində Buxarest sammitində Ukrayna və Gürcüstanın Alyansa üzvlüyü ilə bağlı siyasi bəyanat qəbul edib, lakin hər iki ölkəyə üzvlük üçün hüquqi prosedurda ilk addım olan Üzvlük Fəaliyyət Planını təqdim etməkdən imtina edib. 2019-cu ilin fevralında Ali Rada Ukrayna konstitusiyasına ölkənin NATO-ya üzvlük istəklərini gücləndirən düzəlişləri təsdiqləyib. Kiyev gücləndirilmiş imkanlara malik Alyans tərəfdaşı statusu alıb.
Poliqon.info