Yağışdan çıxıb yağmura düşən Fransa...

Kənan Novruzov: “Makronun çıxış yolu kimi gördüyü növbədənkənar seçkilər Fransanı daha ağır bir böhranın içinə salmış oldu”.

“Makron bu prosesdən dərs çıxarıb öz daxili və xarici siyasətinə əl gəzdirməsə, yenə də kolonial siyasətini davam etdirsə, istisna etmirəm ki, Makronun vaxtından əvvəl istefası tələb oluna bilər”.

Bu sözləri politoloq Kənan Novruzov Fransada keçirilən seçkinin nəticələrini Poliqon-a şərh edərkən qeyd edib.

Artıq Makronun avantürası kimi dəyərləndirilən Fransa seçkiləri arxada qaldı. Seçkilərin nəticələrinə görə isə heç bir partiya hökumət qumaq üçün çoxluğa sahib deyil. Onu da bilirik ki, Fransada tarixən koalisiya hökumətləri qurulmayıb.

Bu baxımdan hazırda Fransada yaranmış siyasi vəziyyəti necə dəyərləndirmək olar? Seçkilərin qalibi olan mərkəz solçular Makronun partiyası ilə koalisiya qurmayacaqlarını elan edib. Bu durumda Fransadakı siyasi böhran hansı nəticələr doğura bilər?

Fransada baş verən prosesləri Poliqon-un əməkdaşı "Report" İnformasiya Agentliyinin əməkdaşı, politoloq Kənan Novruzov ilə müzakirə edib.

Kənan Novruzov: “İndi Makronun prezident kimi qalmasına baxmayaraq, o dayağını itirəcək”.

Seçkilərin Makronun həm daxili, həm də xarici siyasətinə təsir edəcəyini vurğulayan politoloq Poliqon-a bildirib ki, eyni zamanda, müxalif qütb güclənə bilər:

“Ümumiyyətlə, Makronun imkanları zəifləyəcək. Çünki əvvəl hökumətdə Makronun öz partiyası üstünlük təşkil edirdi. Buna görə də, Makronun siyasəti dəstəklənirdi. Amma indi Makronun prezident kimi qalmasına baxmayaraq, o dayağını itirəcək. Yəni Emmanuel Makronun söykənəcəyi dayaqlar olmayacaq.

Bu da o deməkdir ki, perespektivdə Makron daha əvvəlki kimi “at oynada” bilməyəcək. Bu da Makronun həm daxili, həm də xarici siyasətinə təsir edəcək. Eyni zamanda, müxalif qütb güclənə bilər.

Bildiyimizkimi, Fransa prezidentinin səlahiyyətlərinin müddəti 2027-ci ildə başa çatacaq. Makron bu prosesdən dəsr çıxarıb öz daxili və xarici siyasətinə əl gəzdirməsə, yenə də kolanist siyasətini davam etdirsə, istisna etmirəm ki, Makronun vaxtından əvvəl istefası tələb oluna bilər.

Hazırda isə əsas problem Fransada hansı partiyanın hökümət qurmasıdır. Artıq mərkəz solçular hökümətin qurulması ilə bağlı səlahiyyətin onlara verilməsini istəyirlər. Eyni zamnda solçular Makronun partiyası ilə koalisya qurmaqdan da imtina edirlər. Makron da öz növbəsində hökümətin solçulardan ibarət olmasına qarşıdır. Bu da o deməkdir ki, yaxın zamanlarda Fransanı daha böyük və ciddi siyasi sarsıntılar gözləyir. Yəni Makronun çıxış yolu kimi gördüyü növbədənkənar seçkilər Fransanı daha ağır bir böhranın içinə salmış oldu”.

Nərminə UMUDLU
Poliqon.info