Bir qrup naməlum şəxs Türkiyənin hakim Ədalət və İnkişaf Partiyasının (AK Parti, AKP) İstanbuldakı ofisinə atəş açıb...
Poliqon xəbər verir ki, Daily Sabah məlumat yayıb. Hadisə nəticəsində xəsarət alan olmayıb.
Hadisə yerinə gələn polis binanı mühasirəyə alıb, hadisə ilə bağlı araşdırma başlayıb. Partiyanın İstanbuldakı sədri Osman Nuri Kabaktepe hücumu pisləyib. “Biz işin məhkəmədə baxılmasını tələb edəcəyik. Bizim üçün ən böyük təsəlli odur ki, hücum nəticəsində ölən və yaralanan yoxdur”, - deyə Kabaktepe bildirib.
AKP sədr müavini və partiya sözçüsü Ömər Çelik də hücumu pisləyib və partiya üzvlərinin Türkiyənin siyasi qurumuna qarşı hər cür təxribata və hücuma qarşı olduqlarını bildirib.
Aprelin 20-də Türkiyənin cənubunda yerləşən Adana vilayətində naməlum şəxs AKP-nin qərargahına atəş açıb. Şübhəli şəxs avtomatdan binaya 12 atəş açıb, polis onu saxlamağa müvəffəq olub. Aprelin 6-da Türkiyənin müxalif Cümhuriyyət Xalq Partiyasının qərargahı da atəşə tutulub.
Hücumlar mayın 14-də keçiriləcək prezident seçkiləri ərəfəsində həyata keçirilir. Türkiyə sakinləri təkcə dövlət başçısını deyil, həm də parlamentin 600 üzvünü seçəcəklər. Qanuna görə, Türkiyədə ümumi seçkilər iyunun 18-dən əvvəl keçirilməlidir, lakin yanvarda hazırkı prezident Rəcəb Tayyib Ərdoğan onların bir ay əvvəl keçirilməsinə icazə verib. Fevralın əvvəlində ölkə tarixində baş verən ən böyük zəlzələdən sonra onun qərargahı fəlakət səbəbindən seçkiləri iyunun 18-nə təxirə salmağı təklif etsə də, Türkiyə lideri bundan imtina edib.
Poliqon.info