Tramp Avstraliya ilə də ticarət müharibəsinə başlayır

Ana Swanson, Maggie Haberman and Jim Tankersley,
“The New York Times” qəzeti, ABŞ, 2 iyun 2019-cu il

Prezident Donald Tramp Adminstrasiyası ilə yaxın günlərdə Avstraliyadan idxal edilən mallara gömrük vergisi qoyulması ilə bağlı müzakirə keçirib və prezident öz qərarını versə də, Adminstrasiya üzvlərinin bəziləri Trampın bu qərarı ilə razılaşmayıblar.

PİA.az xəbər verir ki, Trampın ən üst səviyyədəki iqtisadi müşavirlərinin dəstəklədiyi bu fikir Dövlət Departamentinin və hərbiçilərin etirazına səbəb olub.

Avstraliyaya tətbiq olunacaq yeni gömrük tarifələrinin əsasən aluminium idxalına tətbiq olunması nəzərdə tutulur. Həmçinin, Avstarliyadan idxal olunan digər məhsulların da rüsumlarının qaldırılması müzakirə olunub. Pentaqon və Dövlət Departamentinin vəzifəli şəxsləri isə Trampın bu qərarına etiraz edərək bildiriblər ki, prezidentin bu qərarı ABŞ-la böyük müttəfiqləri arasında soyuqluq yaradacaq və nəticədə, ABŞ-ın strateji maraqları ziyan görə bilər.

Trampdan Avstraliyaya gömrük vergisi qoyulacağı soruşulduqda isə prezident: “Avstraliyadakı vəziyyət qəribədir”, deyə cavab verib.

Ağ Evin sahibi, həmçinin, müxbirlərə bildirib ki, o, ABŞ-la Avstraliyanın arasındakı münasibətlərdən heç də narazı deyil: “Münasibətlərimiz olduqca güclüdür, ümumiyyətlə, Avstraliya ilə çox xüsusi bir münasibət qurmuşuq”, deyə prezident vurğulayıb.

Qeyd edək ki, prezident Donald Trampın ticarətdə idxal vergisini artırması yaxın müttəfiqləri Kanada, Meksika, Avropa və Yaponiya kimi ölkələrlə ticarət gərginliyinə gətirib çıxarıb. Həmçinin, Trampın atdığı addımlar Çinlə gedən ticarət müharibəsini daha da dərinləşdirir.

Tərcümə PİA.az-ındır.

Orjinal

Fatimə ƏLİYEVA
pia.az