Xəbər verdiyimiz kimi, Bakıda gənc qız intim görüntüləri ilə şantaj edilib. Bu isə telefon istifadəçilərinin təhlükəsizlik problemini bir daha gündəmə gətirib
İKT üzrə ekspert Osman Gündüz “Yeni Sabah”a açıqlamasında fərdi bilgilərin qorunmasının son dövrlərdə aktuallaşdığını bildirib:
“Bunun üçün ilk növbədə istifadəçi özü təhlükəsizliyin qayğısına qalmalıdır. Təbii ki, qanunvericilikdə fərdi məlumatların qorunması ilə bağlı hökümətin qarşısında da müəyyən vəzifələr durur. Bir sıra hüquqi şəxslərə qarşı hökümət tələblər müəyyən edir. Bu vətəndaşla bağlı informasiyaların qorunma şərtləri ilə bağlıdır”.
Ekspert istifadəçilərin məsuliyyət daşıdığı məqamları da qeyd edib:
“Vətəndaşın istifadə etdiyi, könüllü olaraq qoşulduğu müəyyən şəbəkələr, mobil tətbiqlər, proqramlar var ki, vətəndaş özü ilə bağlı informasiyaları onlarda qeyd edir. Bu halda məsuliyyət daha çox vətəndaşın özündədir. O, elementar təhlükəsizlik qaydalarına əməl etməlidir.Yəni birinci bu mobil tətbiqlərin özünə bir baxmaq, araşdırmaq lazımdır ki, nədir? Qarşısına hansı məqsədlər qoyub? Hansı məlumatları tələb edir? Bəzən olur ki, hansısa xidmət üçün ad, soyad tələb olunmur, amma qarşılığında tətbiq özü adımızdan tutmuş telefon nömrəmizə kimi bütün informasiyaları tələb edir. Eyni zamanda avadanlığın özünün standart qaydada olması arzuolunandır. Yəni avadanlıqda antivirus proqramları olmalıdır. Telefonda elə proqramlar ola bilər ki, bilgiləri vətəndaşdan xəbərsiz 3-cü tərəfə ötürə bilər. Hansısa resursdan qeydiyyatdan keçəndə ehtiyatlı olmaq lazımdır. Çünki onun yazılan mail adresinə, telefon nömrəsinə spamlar, mesajlar gələ bilər. Daha ciddi problemlərlə üzləşdikdə Nəqliyyat, Rabitə və Yüksək Texnologiyalar Nazirliyinin Elektron təhlükəsizlik mərkəzinə müraciət edərək metodiki dəstək, informasiya dəstəyi istəmək olar”.
Onun sözlərinə görə, məlumatlarımızın ələ keçirildiyi, təhlükəsizliyimizin pozulduğu halda mütləq aidiyyatı qurumlara müraciət etməliyik:
“Kimsə texniki vasitələrimizi oğurlayarsa, avtomatik olaraq şəxsi məlumatlarımız da ələ keçiriləcək. Bunlar açıqlana, yayıla, başqalarına göndərilə bilər. Bu qanunvericiliklə tənzimlənir və cinayət məsuliyyəti yaradır. Zərərçəkən şəxs dərhal məhkəməyə, hüquqi orqanlara müraciət etməlidir”.
pia.az