Stoltenberq: Ukraynada döyüş meydanında vəziyyət mürəkkəbdir

Poliqon xəbər verir ki, Yens Stoltenberq bu barədə Alyansın müdafiə nazirləri ilə görüşdən əvvəl jurnalistlərə bildirib. Baş katib vurğulayıb ki, Alyans Ukraynanı dəstəkləməyə davam edəcək və Kiyevi danışıqlara sövq etməyi planlaşdırmır.

Stoltenberq qeyd edib ki, Ukraynadakı hərbi münaqişənin nə vaxt səngiyəcəyini müəyyən etmək mümkün deyil. Onun sözlərinə görə, Rusiya ilə danışıqlara nə vaxt və hansı şərtlərlə girəcəyinə yalnız Kiyev qərar verə bilər və vurğulayıb ki, Ukraynaya lazımi hərbi dəstək Moskvanı sülhün müzakirəsinə sövq edə bilər.

“Vladimir Putini danışıqlara inandırmağın yeganə yolu Ukraynanın hərbi gücünü göstərməkdir ki, o, döyüş meydanında qalib gələ bilməyəcəyini başa düşsün”, deyə Stoltenberq bildirib.

Qeyd edək ki, NATO-nun müdafiə nazirləri kritik sualtı infrastrukturun mühafizəsinin gücləndirilməsini və Alyansın Baltik və Şimal dənizlərində mövcudluğunun gücləndirilməsini müzakirə edəcəklər. Oktyabrın əvvəlində Baltik dənizində qaz kəməri və kabelin zədələnməsindən sonra belə tədbirlər müzakirə edilir. Müdafiə nazirləri Ukraynadakı mövcud vəziyyəti də müzakirə edəcəklər.

Poliqon.info