Çin parlamenti Tsin Qanı xarici işlər naziri vəzifəsindən uzaqlaşdırıb, Van İ yenidən Çinin xarici işlər naziri təyin edilib...
Polqin xəbər verir ki, bu barədə Çinin South China Morning Post qəzeti məlumat verib. Qəzet yazır ki, qərar Ümumçin Xalq Nümayəndələri Yığıncağının (ÇXR parlamenti) Daimi Komitəsinin iclasında qəbul edilib.
Qeyd edək ki, Çinin xarici işlər naziri postunu tutan Tsin Qan iyulun ortalarında ictimai sahədən yoxa çıxıb. O, iyunun 25-dən ictimaiyyət qarşısına çıxmayıb.
Tsin Qan 2022-ci ilin dekabrında Çinin xarici işlər naziri təyin edilib. Bundan əvvəl o, Çinin ABŞ-dakı səfiri vəzifəsində çalışıb. Çinin xarici işlər naziri kimi Tsin Qan ABŞ ilə problemli münasibətlərin sabitləşdirilməsində və balon hadisəsindən sonra əlaqələrin bərpasında əsas rol oynayıb. Yüksək rütbəli diplomat Pekinə səfəri zamanı ABŞ dövlət katibi ilə şəxsən görüşüb.
Xatırladaq ki, Van İnin Çin Xarici İşlər Nazirliyinin rəhbəri vəzifəsinə keçməsi ilk dəfə deyil. O, 2013-2022-ci illərdə bu vəzifədə çalışıb. Van İ həmçinin 2018-2022-ci illərdə ÇXR Dövlət Şurasının üzvü olub. 23 oktyabr 2022-ci ildə Çin Kommunist Partiyasının 20-ci Mərkəzi Komitəsinin 1-ci Plenumunda o, ÇKP Mərkəzi Komitəsinin Siyasi Bürosuna seçilib. 2023-cü il yanvarın 1-də Van İ ÇKP Mərkəzi Komitəsinin Xarici Əlaqələr Komissiyasının ofisinin rəhbəri təyin edilib.
Poliqon.info