Rusiya Federasiya Şurası: ABŞ-ın iştirakı ilə növbəti hərbi münaqişə yaxınlaşır...

Poliqon xəbər verir ki, Aleksey Puşkov Telegram kanalında ABŞ-ın iştirakı ilə növbəti hərbi münaqişənin yaxınlaşdığı barədə fikir bildirib.

"Zəncirvari reaksiya var - bir hərbi böhran digərini doğurur. Bu səbəbdən dünyanın getdikcə daha çox regionunda sabitlik dağılır. Yaxın Şərqdəki böhran yeni böhranın - Qırmızı dənizin tətikçisi ola bilər", deyə Puşkov yazıb.

O, Yəmənin müdafiə nazirinin bəyanatına istinad edərək, ölkənin Qərb gəmilərini batırmaq üçün bütün lazımi vasitələrə malik olduğunu bildirib. Puşkov hesab edir ki, hadisələrin bu cür inkişafı daha ​​bir hərbi münaqişənin yolda olması deməkdir.

Bir müddət əvvəl "Ənsar Allah" qrupunun rəsmi nümayəndəsi Yəhya Səriya yəmənli husilərin İsraillə əlaqəli olduğu iddia edilən "Swan Atlantic" tankerinə və "Clara" konteyner gəmisinə hücum etdiyini bildirib.

ABŞ müdafiə naziri Lloyd Ostin ötən axşam Qırmızı dənizdə naviqasiya azadlığını təmin etmək üçün çoxmillətli əməliyyata başlanması barədə bəyanat verib. Səbəb Yəmən husilərinin ticarət gəmilərinə hücumlarıdır. Əməliyyata Böyük Britaniya, Bəhreyn, Kanada, Fransa, İtaliya, Niderland, Norveç, İspaniya və Seyşel adaları daxil olacaq.

"Son vaxtlar Yəməndən husilərin ehtiyatsız hücumlarının artması ticarətin azad axınını təhdid edir, günahsız dənizçiləri təhlükə altına alır və beynəlxalq hüququ pozur. Bu, kollektiv fəaliyyət tələb edən beynəlxalq çağırışdır. Buna görə də mən bu gün "Prosperity Guardian" (Rifahın keşikçisi-red.) əməliyyatının yaradılmasını elan edirəm”, deyə Ostin bəyanatında bildirib.

Xatırladaq ki, Yəmən husiləri İsrail və HƏMAS arasında müharibə başlayandan bəri beynəlxalq sularda gəmilərə hücum edir. Husilər müharibədə Fələstin hərəkatını dəstəkləyib və İsraillə əlaqəli gəmilərə hücum edəcəklərini vəd ediblər. Bunun fonunda bir çox şirkətlər Qırmızı dəniz vasitəsilə yük daşımaqdan imtina ediblər.

Poliqon.info