Böyük Britaniya ərzaq daşıyan və ya Ukrayna limanlarına gedən gəmilərə hücumların qarşısını almaq üçün Qara dənizdə kəşfiyyatı gücləndirir...
Poliqon xəbər verir ki, bunu sentyabrın 9-10-da Yeni Dehlidə keçiriləcək G20 sammiti ərəfəsində Böyük Britaniyanın baş naziri Rişi Sunak deyib.
“Rusiyanın Qara dənizdəki fəaliyyətini izləmək, mülki gəmilərə və ya infrastruktura hücumlar hazırladığına dair əlamətlər barədə xəbərdarlıq etmək və hücumlara görə məsuliyyət daşıyanları müəyyənləşdirmək, məqsədyönlü yalan iddialara qarşı çıxmaq, şübhələri aradan qaldırmaq üçün kəşfiyyatımızdan və məlumat bazamızdan istifadə edəcəyik”, deyə Sunak bildirib.
Rusiya iyulun 18-də “taxıl sazişi”ndə iştirakını onun şərtlərinə əməl etmədiyi üçün dayandırıb. İyulun 19-da Rusiya Müdafiə Nazirliyi elan edib ki, iyulun 20-dən etibarən Qara dənizdən keçərək Ukrayna limanlarına üzən bütün gəmilər hərbi hədəf kimi tanınacaq. Avqustun 5-də Ukrayna Rusiyanın Qara dəniz limanlarını hərbi təhlükə zonası elan edib.
Poliqon.info