Polşa Ukrayna taxılının idxalına qeyri-müəyyən qadağa qoyulmasını müdafiə edib və bunu Ukraynanın Avropa İttifaqına daxil olması ilə əlaqələndirib...
Poliqon xəbər verir ki, bu bəyanatla Polşanın kənd təsərrüfatı naziri Robert Telus çıxış edib.
Nazir qeyd edib ki, qadağa ən azı Avropa İttifaqı ilə Ukrayna arasında bütün kənd təsərrüfatı məsələləri, o cümlədən Ukraynanın Aİ-yə daxil olmaq niyyəti kontekstində razılaşdırılana qədər qüvvədə qalmalıdır.
Telus bildirib ki, Avropa Komissiyasından taxıl embarqosunun ən azı ilin sonuna qədər uzadılmasına dair qərar gözləyir, lakin bu, Polşa üçün kifayət deyil:
"Mövcud şərtlərdə Ukrayna Avropa İttifaqına daxil ola bilməz, çünki bu, Polşa kənd təsərrüfatına zərər verəcək. Taxılın lazım olan yerə getməsi çox vacibdir və bu taxıla ehtiyacı olan ölkələrin ərzaq təhlükəsizliyi üçün vacibdir".
O, iddia edir ki, Ukrayna indi Rusiyanın tammiqyaslı işğalından əvvəlki qədər taxıl ixrac edir, lakin bu, Asiya və ya Afrikaya getməkdənsə, Avropada başa çatır.
Qeyd edək ki, 2023-cü ilin yazında bir sıra Avropa ölkələri, o cümlədən Polşa Ukrayna taxılının öz ərazilərinə idxalına birtərəfli qaydada qadağa qoyub. İyun ayında Ukrayna taxılının idxalına qoyulan qadağa sentyabrın 15-dək uzadılıb.
Macarıstanın kənd təsərrüfatı naziri İştvan Naqinin sözlərinə görə, o, rumın, bolqar və slovakiyalı həmkarları ilə razılaşıb ki, Avropa Komissiyası bunu etməsə, Ukrayna kənd təsərrüfatı məhsullarının idxalına qoyulan qadağanı uzadacaqlar.
Sentyabrın 13-də Aİ-nin Ticarət Komissarı Ofisinin rəhbəri Maykl Haqer Ukrayna taxılının və yağlı bitkilərin Polşa, Rumıniya, Bolqarıstan, Slovakiya və Macarıstana idxalına qoyulan qadağanın uzadılmasını təklif edib.
Poliqon.info