Pentaqon ABŞ ordusuna ayrılan vəsaitin tükənməsi ilə bağlı xəbərdarlıq edib

ABŞ Müdafiə Nazirliyinin sözçüsü polkovnik-leytenant Qarron Qarn bildirib ki, hərbi departament Konqres tərəfindən Ukraynaya yardım nəticəsində tükənmiş arsenalların doldurulması üçün ayrılan vəsaiti tükəndirib...

Poliqon xəbər verir ki, bu barədə The Washington Post nəşri məlumat yayıb.

Onun sözlərinə görə, mövcud vəsait balansı ehtiyatların artırılması üçün müraciətlərin miqyasına uyğun gəlmir, bu baxımdan Pentaqon qərarların daha geniş strateji hədəflərə uyğun olmasını təmin etmək üçün gələcək nəticələri diqqətlə qiymətləndirəcək.

"Əlavə maliyyə olmadan, Ordu hərbi təchizat çatışmazlığı ilə üzləşəcək və bu da öz növbəsində bizim hazırlığımıza təsir edəcək", deyə Qarron Qarn xəbərdarlıq edib.

Bundan əvvəl ABŞ dövlət katibi Entoni Blinken ABŞ-ın Ukraynaya 250 milyon dollarlıq hərbi yardım paketi ayırdığını və bunun bu il sonuncu olacağını bildirmişdi. Sonradan məlum olub ki, ABŞ prezidenti Co Bayden dövlət katibi Entoni Blinkenə Ukraynaya 20 milyon dollara qədər əlavə yardımın göstərilməsinin mümkünlüyünü nəzərdən keçirməyi tapşırıb.

Qeyd edək ki, Konqress Ukrayna, İsrail və Tayvan üçün nəzərdə tutulmuş 106 milyard dollarlıq yardımı Meksika sərhədindəki vəziyyətə görə təsdiqləməkdən imtina edib.