“Ötən yüz il ərzində dünya “bir millət iki dövlət” həqiqətinin şahidi olub” - VHP sədri

Sabir Rüstəmxanlı: “Qəhrəman türk əsgəri 1918-ci ildə öz zəfər bayrağını Azərbaycan torpaqlarında da dalğalandırıb və xalqımızı rus-erməni qoşunlarının həyata keçirdiyi soyqırım aktlarından xilas edib”.

Vətəndaş Həmrəyliyi Partiyasının sədri, millət vəkili Sabir Rüstəmxanlı 30 avqust – Zəfər bayramı münasibətilə Türk millətinə təbrik ünvanlayıb:

“Bu gün qardaş Türkiyənin milli bayramlarından biri, 30 avqust – Zəfər bayramı qeyd olunur. Bu bayram Türkiyə tarixinə Birinci Dünya müharibəsindən məğlub çıxan Osmanlı dövlətinin işğalçı ölkələr arasında paylaşdırılması planlarının qarşısının alınması ilə əlamətdardır. O zaman böyük sərkərdə və dövlət xadimi Mustafa Kamal Atatürkün başçılıq etdiyi vətənpərvər qüvvələr siyasi və mənəvi iflasa uğramış xanədanlığın xarabalıqları altından bugünkü Türkiyə Cümhuriyyətini dirçəltmək üçün böyük mücadilə və qurbanlar veriblər.

Möhtəşəm Çanaqqala zəfəri sonradan bütün Türkiyənin, eləcə də türk dünyasının zəfəri kimi qeyd olunmağa başlyıb.

Zəfər bayramı Türkiyə Cümhuriyyətinin milli bayramıdır. Hər il avqustun 30-da qeyd olunur. Zəfər bayramı 1922-ci ilin 26 avqustunda başlayıb 30 Mustafa Kamal Paşanın baş komandanlığı altında qələbəylə nəticələnən bu döyüş simvolik olaraq ölkə torpaqlarının geri alındığı günü təmsil edir.

Qəhrəman türk əsgəri 1918-ci ildə öz zəfər bayrağını Azərbaycan torpaqlarında da dalğalandırıb və xalqımızı rus-erməni qoşunlarının həyata keçirdiyi soyqırım aktlarından xilas edib. Azərbaycan Cümhuriyyəti həm də türk əsgərinin zəfərinin əsəridir və xalqımız dünya durduqca bunu unutmayacaq. Eyni zamanda Türkiyə Cumhuriyyətinin qurulmasında minlərlə Azərbaycanlı şəhid olub. Ötən yüz il ərzində dünya "bir millət iki dövlət" həqiqətinin şahidi olub. 30 abqust bütün Türk Dünyası üçün zəfər və qürur günüdür. Bu gün münasibəti ilə bütün Türk millətini təbrik edirəm!”

pia.az