Biznes kreditlərinə tələbi artıran səbəblər...

İqtisadçı-ekspert: “Biznes kreditlərinə tələbin artmasının səbəbi odur ki, ilin ikinci yarısında iqtisadi aktivlik daha yüksək olur”.

“İlin ikinci yarısında büdcədən də xərcləmələr daha rəvan və gözlənilən olur. Yəni tam gücü ilə büdcə, investisiya xərcləri həyata keçirilir. Bu da imkan verir ki, aktivlik artısın”.

Bu sözləri iqtisadçı-ekspert Xalid Kərimli Azərbaycan Mərkəzi Bankının kreditləşmə fəaliyyətinə dair sorğusunun nəticələrini Poliqon-a şərh edərkən qeyd edib.

2024-cü ilin II rübündə sorğu nəticələrinə əsasən mikro, kiçik və orta sahibkarlıq (MKOS) subyektlərinə verilən kreditlər üzrə standartlarda yumşalma, iri sahibkarlıq subyektlərinə verilən kreditlər üzrə standartlarında dəyişiklik müşahidə edilməyib. Banklar tərəfindən növbəti rübdə MKOS subyektlərinə kreditlər üzrə standartlarda yumşalmanın davam etməsi, iri sahibkarlıq subyektlərinə kreditlər üzrə standartlarda isə dəyişiklik olmaması gözlənilir.

Bu barədə Azərbaycan Mərkəzi Bankının (AMB) kreditləşmə fəaliyyətinə dair sorğunun nəticələrində bildirilib.

Sorğunun nəticələrində qeyd edilib ki, 2024-cü ilin II rübündə MKOS subyektlərinə verilən kreditlərə tələbdə artım davam edib. Bankların gözləntilərinə əsasən 2024-cü ilin III rübündə biznes kreditləri, xüsusilə MKOS kreditləri üzrə tələbdə artım müşahidə olunacaq.

Bu proqnoz barədə nə demək olar? Biznes kreditlərinə tələbi artıran səbəblər nədir?

Mövzunu Poliqon-un əməkdaşı iqtisadçı-ekspert Xalid Kərimli ilə müzakirə edib.

Xalid Kərimli: “Bu il iqtisadi artım daha yaxşıdır. Banklar da bunun əsasında proqnozlarını verirlər”.

Bu ilki iqtisadi aktivliyin keçən illə müqayisədə daha yüksək olduğunu vurğulayan ekspert əlavə edib ki, keçən ilin bu dövrlərində iqtisadi artım yox idi:

“Biznes kreditlərinə tələbin artmasının səbəbi odur ki, ilin ikinci yarısında iqtisadi aktivlik daha yüksək olur. Biznes baxımından birinci rübdə büdcə gec açıldığına, ikinci rübdə tətillər olduğuna görə, üçüncü və dördüncü rüblər daha aktiv olur. Buna görə də, banklar belə bir gözləntilərini ehtiva edirlər.

Eyni zamanda, ilin ikinci yarısında büdcədən də xərcləmələr daha rəvan və gözlənilən olur. Yəni tam gücü ilə büdcə, investisiya xərcləri həyata keçirilir. Bu da imkan verir ki, aktivlik artısın.

Onu da qeyd edim ki, bu ilki iqtisadi aktivlik keçən illə müqayisədə daha yüksəkdir. Keçən ilin bu dövrlərində iqtisadi artım yox idi. Amma bu il iqtisadi artım daha yaxşıdır. Banklar da bunun əsasında proqnozlarını verirlər. Banklar müştərilərinin fəaliyyətləri haqqında məlumatlı olurlar. Yəni banklar müştərilərin fəaliyyətlərini proqnozlaşdırırlar”.

Nərminə UMUDLU
Poliqon.info