Ermənistan Silahlı Qüvvələrinin Baş Qərargah rəisi müharibə istəyir?..

Politoloq: “4 kəndin Azərbaycana verilməsi bu gün Bakı tərəfindən ciddi bir tələb kimi irəli sürülüb”.

“Ermənistan Silahlı Qüvvələrinin Baş Qərargah rəisinin Edvard Aseryanın fikirləri şübhəsiz ki, danışıqlar müstəvisində sorğulanacaq”.

Bu sözləri politoloq İlyas Hüseynov Ermənistan Silahlı Qüvvələrinin Baş Qərargah rəisi Qazaxın 4 kəndi ilə bağlı dediklərini Poliqon-a şərh edərkən qeyd edib.

Ermənistan Silahlı Qüvvələrinin Baş Qərargah rəisi Edvard Asryan parlamentdə jurnalistin Tavuş vilayətindəki 4 kəndin (Qazaxın işğal altındakı anklav olmayan kəndləri – red.) qaytarılması ilə bağlı sualına cavab verərkən əraziləri təhvil verməyəcəklərini deyib.

Edvard Asiyanın bu bəyanatı nədən xəbər verir və bu bəyanat Ermənistan-Azərbaycan sərhədində yeni gərginliyə səbəb ola bilərmi?

Mövzunu Poliqon-un əməkdaşı Sosial Tədqiqatlar Mərkəzinin (STM) sektor müdiri, politoloq İlyas Hüseynov ilə müzakirə edib.

İlyas Hüseynov: “Gec və ya tez bu kəndlər Azərbaycanın nəzarətinə keçəcək. Lakin biz bunun dinc, silahsız yolla həllinin tərəfdarıyıq”.

Ermənistanda bəzi hakim partiya nümayəndələrinin hələ də revonşist ideologiyaya sadiq fikirlər söylədiklərini xatırladan politoloq Poliqon-a açıqlamasında qeyd edib ki, Ermənistan iqtidarında və müxalifətində bəzi qüvvələr var ki, onlar hələ də reallıqla barışmırlar:

“Qeyd edim ki, 4 kəndin Azərbaycana verilməsi bu gün Bakı tərəfindən ciddi bir tələb kimi irəli sürülüb. Xüsusilə, Nikol Paşinyanın bu kəndlərə səfər etməsi orada icma nümayəndələri ilə, ağsaqqallarla görüşündə də ictimai rəyin öyrənilməsi, nəbzin yoxlanılması və gələcəkdə də kəndlərin Azərbaycan nəzarətinə verilməsi ilə bağlı fikirlər bizdə ümid yaradır ki, bu kəndlər dinc, danışıqlar yoluyla Azərbaycanın nəzarətinə veriləcək. Lakin təəssüflər olsun ki, Ermənistan iqtidarında və müxalifətində bəzi qüvvələr radikal düşüncəni əks etdirirərık kəndlərin qaytarılmasının mümkünsüz olduğunu ifadə edirlər. Onlar hələ də reallıqla barışmaq istəmirlər. Hətta bəzi terror qruplaşmaları könüllü özünümüdafiə batalyonları vasitəsilə mütləq sürətdə bu kəndlərin mühafizəsini gündəmə gətirir və bununla da sülh əleyhinə olduqlarını nümayiş etdirirlər.

Ermənistan Silahlı Qüvvələrinin Baş Qərargah rəisinin Edvard Aseryanın fikirləri şübhəsiz ki, danışıqlar müstəvisində sorğulanacaq. Dəfələrlə biz görmüşük ki, Ermənistanda hakim iqtidarda olan partiyaların nümayəndələri revonşist ideologiyaya sadiq fikirlər söyləyiblər. Hətta qapalı görüşlərdə bu fikirlər masaya yatırılıb və bildirilib ki, bu fikirləri söyləyənlər bu gün hakimiyyətdə olan qüvvələrdir. Onların özü də revonşizmi dəstəkləyir sülh əleyhinə fikirlər və açıqlamalar bildirirlər.

İlyas Hüseynov: “Gələcəkdə kəndlərin Azərbaycan nəzarətinə verilməsi ilə bağlı fikirlər bizdə ümid yaradır ki, bu kəndlər dinc, danışıqlar yoluyla Azərbaycanın nəzarətinə veriləcək”.

Hazırda hərbiçinin fikirləri də bunu deməyə əsas verir ki, Ermənistan hakimiyyəti sanki imitasiyayla məşğuldur. Onlar kəndlərin verilməsi görüntüsünü yaradır, daxildə vəziyyəti qızışdırır, neqativlər yaradır və məhz bu neqativləri də sonrakı prosesdə danışıqlar masasına daşıyır. Bu da Nikol Paşinyan tərəfindən dəfələrlə işlədilmiş bir taktikadır və çox çalışır ki, ictimai rəyi əsas gətirərək danışıqlardan yayınsın.

Bütün hallarda, gec və ya tez bu kəndlər Azərbaycanın nəzarətinə keçəcək. Lakin biz bunun dinc, silahsız yolla həllinin tərəfdarıyıq”.

Nərminə UMUDLU
Poliqon.info