HƏMAS İsraili Qəzzada atəşkəsdən yayınmağa çalışmaqda ittiham edib

Poliqon xəbər verir ki, bu barədə Fələstinin HƏMAS hərəkatı Telegram kanalında məlumat yayıb.

Bəyanatda deyilir ki, HƏMAS Fələstin xalqına qarşı "təcavüzü tamamilə dayandırmağa"çağıran razılaşma əldə etmək üçün lazımi çeviklik nümayiş etdirib.

Bununla belə, hərəkata görə, İsrail sözügedən razılaşmanın şərtlərindən, xüsusən də daimi atəşkəs, köçkünlərin geri qaytarılması, İsrail qoşunlarının Qəzza zolağından çıxarılması və fələstinlilərin ehtiyaclarının ödənilməsi ilə bağlı şərtlərdən yayınmağa cəhd etməkdə davam edir.

Qeyd edək ki, martın 3-də Qahirədə Qəzza zolağında atəşkəslə bağlı danışıqlar başlayıb. İsrail nümayəndə heyəti bu raundda iştirak etmir. Martın 4-də "Əl-Ghad" televiziyası tərəflərin danışıqların ilk günündə əhəmiyyətli irəliləyiş əldə etdiklərini və martın 11-dən əvvəl bir növ konsensus əldə edəcəyini bildirib.

Oktyabrın 7-də HƏMAS hərəkatının minlərlə silahlı tərəfdarının Qəzza zolağından İsrailə daxil olması, dinc əhaliyə hücum etməsi və 200-dən çox insanı qaçırması ilə Yaxın Şərqdə vəziyyət gərginləşib. Buna cavab olaraq İsrailin baş naziri Benyamin Netanyahu ölkənin müharibə vəziyyətində olduğunu bəyan edib. Quru əməliyyatı başladılıb, onun məqsədi girovların qaytarılması və HƏMAS-ın tamamilə məhv edilməsidir.

Poliqon.info