ABŞ vitse-prezidenti Harris: Çox sayda məsum fələstinli öldürülüb...

Poliqon xəbər verir ki, bu barədə Reuters və France Press Agentliklərinin məlumatlarında bildirilir. Məlumatklarda qeyd edilir ki, Kamala Harris bu günə qədər Amerika administrasiyasından İsraillə qarşı ən sərt fikirlər səsləndirib. Bununla belə, Harris qeyd edib ki, İsrail özünü müdafiə etmək hüququna malikdir və HƏMAS-ın yaratdığı təhlükə aradan qaldırılmalıdır. Vitse-prezidentin səsləndirdiyi fikirlər Ağ Evin saytında yer alıb.

Xanım Harris fevralın sonunda humanitar yardım üçün gələn fələstinlilərin öldürülməsinə diqqət çəkib.

“Dəfələrlə dediyim kimi, çoxlu sayda günahsız fələstinli öldürülüb. Cəmi bir neçə gün əvvəl biz Qəzzanın şimalında çox az və ya heç bir yardım görməyən həftələrdən sonra ailələri üçün yemək almağa çalışan ac, çarəsiz insanların yardım maşınlarına yaxınlaşdığını gördük. Onları atəş və xaosla qarşıladılar”, ABŞ-ın vitse-prezidenti Alabama ştatının Selma şəhərində deyib.

Vitse-prezident baş verənlərə görə birbaşa olaraq münaqişə tərəflərindən birini günahlandırmayıb. Lakin İsrail və HƏMAS baş verınlərə görə bir-birini günahlandırır. Tibb orqanlarının məlumatına görə, yardımın paylanması zamanı atışma zamanı 118 nəfər ölüb, 760 nəfər yaralanıb.

Kamala Harris İsrail hökumətini yardım axınını əhəmiyyətli dərəcədə artırmaq üçün daha çox iş görməyə çağırıb.

“Bəhanə yoxdur. Onlar yeni sərhəd keçidləri açmalıdırlar. Yardımın çatdırılmasına heç bir lazımsız məhdudiyyət qoymamalıdırlar. Onlar humanitar personalın, obyektlərin və konvoyların hücuma məruz qalmamasını təmin etməlidirlər. Və onlar Qəzzada əsas xidmətlərin və nizamın bərpası üçün çalışmalıdırlar ki, ehtiyacı olanlar daha çox qida, su və yanacaq ala bilsinlər”, deyə Harris əlavə edib.

Vitse-prezident bildirib ki, Qəzzadakı əzabların miqyasını nəzərə alaraq, danışıqlarda müzakirə olunan ən azı altı həftə ərzində dərhal atəşkəsə ehtiyac var.

“HƏMAS deyir ki, atəşkəs lazımdır. Yaxşı, müqavilənin şərtləri artıq mövcuddur. HƏMAS da bu sövdələşməyə razı olmalıdır”, deyə vitse-prezident vurğulayıb.

Poliqon.info