ABŞ-ın Rusiyaya qarşı yeni sanksiyaları “500-dən çox hədəfə” qarşı yönəldiləcək...
Poliqon xəbər verir ki. bu barədə ABŞ Maliyyə Nazirinin müavini Uolli Adeyemo bildirib. Məhdudiyyətlərin bu gün, fevralın 23-də tətbiqi planlaşdırılır.
Nazir müavininin sözlərinə görə, sanksiyalar Rusiyanın silah istehsalı üçün zəruri olan mallara çıxış əldə edə bilməyəcəyini təmin etmək məqsədi daşıyır. Məhdudiyyətlər həmçinin Rusiyanın iqtisadiyyatını dəstəkləmək üçün ehtiyac duyduğu gəlirlərə çıxışını yavaşlatmağı da hədəfləyir.
Adeyemo qeyd edib ki, sanksiyalar Rusiyanın hərbi sənaye kompleksinə və üçüncü ölkələrdəki şirkətlərə təsir edəcək ki, bu da Rusiyanın ehtiyac duyduğu mallara çıxışını çətinləşdirəcək.
“Biz yüzlərlə sanksiya tətbiq edəcəyik, lakin yadda saxlamaq lazımdır ki, Amerika bu addımları atmaqda tək deyil”, deyə Uolli Adeyemo Reuters Agentliyinə deyib.
Qeyd edək ki, ABŞ Dövlət Katibinin müavini Viktoriya Nuland Vaşinqtonun planlaşdırdığı məhdudiyyətlərin “dağıdıcı” olacağını və onların əksəriyyətinin Rusiyanın müdafiə sənayesinə təsir edəcəyini bildirib.
Avropa İttifaqı isə hazırda Rusiyaya qarşı 13-cü sanksiyalar paketini hazırlayır. Bu sanksiyaların sabah, fevralın 24-də, Rusiyanın Ukraynada hərbi əməliyyatına başlamasının ildönümündə təsdiqlənəcəyi gözlənilir.
Poliqon.info