“Şəmkir Rayon Mərkəzi Xəstəxanasında pastel çatışmazlığı var. Palataları şəraitindən asılı olaraq xəstələrə 10 və 20 manat qarşılığında satırlar”.
Bunu Yeniavaz.com-a müraciət edən rayon sakini Məmmədli Qasım Maarif oğlu deyib.
O iddia edir ki, bu xəstəxanada ağrıkəsici və əməliyyat olunmuş şəxsə lazım olan digər preparatları xəstə yaxınları cibinin pulu ilə alır:
“Qardaşım Məmmədov Cəfər Maarif oğlu qarın nahiyəsindəki ağrılarla gedib xəstəxanaya, Nurlan adlı həkim onu səhv istiqamətə yönləndirib. Əslində isə qardaşımda kor bağırsaq artıq zəhərlənmə vermə həddində olub. Əməliyyat üçün günorta saatlarında xəstəxanaya gediblər. Xəstə ölüm ayağında olsa da, növbətçi cərrah deyib, mən baxa bilmərəm, iş vaxtım bitib, gözləyin cərrah gəlsin. Tibb bacıları xəstənin yaxınlarından “bəxşiş” alırlar, verməyən xəstəyə baxmırlar. Xəstə yaxınları qorxurlar ki, tibb bacısı baxmaz, adam ölər. Ona görə, məcbur olub pul verirlər. 220 mindən artıq əhalisi olan rayonun mərkəzi xəstəxanasındakılar ağ xalatlı cəlladlardı desək, yerinə düşər. Çünki bu adamlar adi kor bağırsaq diaqnozunu düzgün müəyyənləşdirə bilmirlər. Aidiyyəti qurum TƏBİB isə şikayətə baxmır”, - rayon sakini bildirib.
Q. Məmmədli deyir ki, burada xəstənin yanında qalan yaxın adamlarına gecə yatmaq üçün çarpayının birini 2 manata satırlar:
“İmkanı biraz zəif olanlar soğan kimi soyulacaqlar deyə xəstəxanaya nəinki getmirlər, hətta yolunu unudublar, o tərəfə ümumiyyətlə baxmırlar. Hələ xəstəxanada işləyən həkim və tibb bacılarının savad və bacarıqlarından danışmıram. Həkimlər savadsızdırlar, düzgün diaqnoz qoya bilmirlər. Bir sözlə, Şəmkir Rayon Mərkəzi Xəstəxansını bazara çeviriblər. Bununla bağlı aidiyyəti qrumlara - TƏBİB və İcbari Tibbi Sığorta Agentliyinə şikayət olunsa da, heç bir reaksiya yoxdur”.
İddialarla bağlı TƏBİB-ə müraciət etsək də, qurumdan sorğumuza, həmçinin iddiaların araşdırılmasına dair hər hansı cavab verilməyib.
Qeyd edək ki, Şəmkir Rayon Mərkəzi Xəstəxanasının sosial şəbəkə hesablarında qeyd olunub ki, tibb müəssisəsi TƏBİB-in tabeliyində fəaliyyət göstərir.
Poliqon.info
Digərxəbərlər
Populyar xəbərlər
