ABŞ Konqresinin Nümayəndələr Palatası Ukraynaya, İsrailə və Tayvana yardım ayırmadan fevralın 28-dək işinə fasilə verib...
Poliqon The Hill nəşrinə istinadən xəbər verir ki, Ağ Evin mətbuat katibinin müavini Endryu Beyts Nümayəndələr Palatasının spikeri Mayk Consonun tətil qərarını tənqid edib. O, Consonun bu addımını “tətilə qaçmaq” adlandırıb.
“Hər gün Conson səsverməni gecikdirir, Amerika xalqının gözündə Konqresdə Respublikaçıların etibarı azalır”, deyə Beyts qeyd edib.
Qeyd edək ki, fevralın 13-də ABŞ Senatı Ukrayna, İsrail və Tayvana 95 milyard dollardan çox yardım ayrılmasını nəzərdə tutan qanun layihəsini dəstəkləyib. Qanun layihəsi çərçivəsində Kiyevə 60 milyard dollardan çox pul veriləcək.
Konqresin yuxarı palatasının 100 üzvündən 70-i sənədin lehinə səs verib. Qanun layihəsinin razılaşdırılması təxminən dörd aya yaxın vaxt aparıb. Sənəd indi Respublikaçıların nəzarətində olan Nümayəndələr Palatası tərəfindən təsdiqlənməlidir. Respublikaçı konqresmenlər layihədə ABŞ-ın cənub sərhədinin möhkəmləndirilməsi tədbirlərinin olmamasından narazıdırlar.
Poliqon.info