Avropa İttifaqı səfirləri Macarıstanın mövqeyinə görə Rusiyaya qarşı sanksiyalarla bağlı razılığa gələ bilməyiblər...
Avropa İttifaqı ölkələrinin səfirləri Çin şirkətlərinə qarşı məhdudlaşdırıcı tədbirlərin tətbiqini dəstəkləməyən Macarıstanın mövqeyinə görə Rusiyaya qarşı yeni sanksiyalar paketini təsdiq edə bilməyib.
Poliqon xəbər verir ki, bu barədə Financial Times qəzeti mənbələrə istinadən məlumat yayıb.
Nəşr yazır ki, Aİ səfirlərinin görüşündə sanksiyaların əleyhinə çıxış edən yeganə ölkə Macarıstan olub. Sanksiya siyahısı Rusiya, Çin və digər ölkələrdən 200-ə yaxın şəxs və şirkətə qarşı məhdudiyyətləri nəzərdə tutur. Adı açıqlanmayan məmurun sözlərinə görə, Macarlar Çin şirkətlərinə görə sanksiyalara veyo qoyub.
Qeyd edək ki, Aİ ölkələri Rusiyaya qarşı 13-cü sanksiyalar paketini fevralın 24-də, Ukraynada hərbi əməliyyatların başlamasının ikinci ildönümünə qədər qəbul etməyi planlaşdırır. Reuters Agentliyinin məlumatına görə, bu tarixə qədər sanksiyaları qəbul etməyə vaxt tapmaq üçün Avropa Komissiyası malların idxalına yeni qadağaları paketə daxil etməyəcək. Bloomberg Agentliyinin məlumatına görə isə Rusiya hüquqi şəxsləri ilə yanaşı, məhdudiyyətlərin yeni siyahısına üç Çin şirkəti, həmçinin Honq-Konq, Serbiya, Hindistan və Türkiyədən firmalar daxildir.
Poliqon.info