Şiə “Ənsar Allah” hərəkatı 165 000-dən çox ehtiyatda olan əsgərə hərbi təlim keçib...
Poliqon xəbər verir ki, bu barədə hərəkatın lideri və silahlı qüvvələrinin baş komandanı Abdel Malik əl-Husi bildirib. Onun sözlərinə görə, Yəmən ordusu “yüksək mənəviyyat və döyüş ruhunu” qoruyur.
Əl-Husi ABŞ-ın Yəmənə zərbələr endirməyə başladığı yanvarın 12-dən bəri 600 min insanın ümumi hərbi, idarəçilik və xüsusi təlim keçdiyini iddia edib. Husi lideri səfərbərliyin bir hissəsi kimi təlim və hərbi inkişaf fəaliyyətlərinin Yəmənin bir çox bölgəsinə yayılacağını vəd edib.
“Mütəxəssislərimizin statistikasına görə, əhali arasında 165 429 nəfər hərbi kurslarda təlim keçib və ixtisasa yiyələnib”, deyə Abdel Malik əl-Husi deyib.
Qeyd edək ki, 2023-cü il oktyabrın 7-dən İsrail ilə Husilərin dəstəklədiyi Fələstin HƏMAS hərəkatı arasında müharibə davam edir. İsrail 1400 nəfərin öldüyünü, Fələstin rəsmiləri isə qurbanların sayını 27 000 nəfər hesab edir. İsrail rəsmiləri bu həftə HƏMAS yaraqlılarının dörddə birini öldürdüyünü bildirib.
Dünən, fevralın 1-də Qətər Xarici İşlər Nazirliyi İsrailin atəşkəsə razılaşdığını və HƏMAS-ın da təşəbbüsü müsbət qiymətləndirdiyini bildirib.
Poliqon.info